Pavlodar qoımalarynda 50 myń tonna kartop pen 30 myń tonna sábiz saqtalyp tur
PAVLODAR. KAZINFORM – Atalǵan kólem oblys halqynyń kúzge deıingi qajettiligin tolyq qamtamasyz etýge jetkilikti. Óńirde kartoptyń kóterme baǵasy kılogramyna – 115-130 teńge, al sábizdiki 130-150 teńge aralyǵynda saqtalyp otyr.
Qazirgi ýaqytta oblysta jalpy syıymdylyǵy 550,9 myń tonnany quraıtyn kókónis saqtaý qoımalary jumys isteıdi. Sonyń ishinde 133 qoıma (483,8 myń tonna) zamanaýı qural-jabdyqtarmen jabdyqtalǵan. Budan bólek, 13 qoıma (58 myń tonna) arnaıy tońazytqysh qondyrǵylarymen qamtamasyz etilgen. Jalpy alǵanda, saqtaý ınfraqurylymy jetkilikti deńgeıde damyǵan.
– Byltyr Pavlodar oblysynda 711,5 myń tonna kartop, 146,6 myń tonna sábiz jınalǵan bolatyn. Óńir turǵyndarynyń kartop boıynsha jyldyq qajettiligi 75,4 myń tonna ekenin eskersek, qamtamasyz etý deńgeıi qajettilikten 11 ese joǵary. Sábizge degen jyldyq qajettilik 17,3 myń tonna bolsa, qamtamasyz etilýi 10 ese kóp. Artyq ónim syrtqa satylady. 2025 jyly oblys sharýalary 183,4 myń tonna kartopty Ózbekstan, Reseı, Túrkimenstan jáne Tájikstan elderine eksporttady. Sondaı-aq Ózbekstan, Reseı jáne Qyrǵyzstan baǵyttaryna 24,5 myń tonna sábiz jóneltildi. Al jyl basynan syrtqa 36,7 myń tonna kartop pen 4,6 myń tonna sábiz jiberilgen. Bul kórsetkishter óńirdiń eksporttyq áleýetiniń joǵary ekenin baıqatyp otyr, - deıdi oblystyq aýyl sharýashylyǵy basqarmasy basshysynyń orynbasary Tólegen Kósherbaev.
Basqarma dereginshe, qazirgi ýaqytta jergilikti kókónis saqtaý qoımalarynda 50,4 myń tonna kartop pen 30 myń tonna sábiz saqtalyp tur. Mamandar atalǵan kólem oblys halqynyń jańa ónim alynǵanǵa deıingi qajettiligin tolyq qamtamasyz etýge jetkilikti ekenin aıtady.
Oblysta atalǵan ónimder boıynsha kóterme baǵalar turaqty deńgeıde saqtalyp turǵany baıqalǵan. Kartoptyń baǵasy kılogramyna 115-130 teńge aralyǵynda bolsa, sábiz – 130-150 teńge.
Atap óterligi, aldaǵy egis naýqanynda tuqymǵa 60,9 myń tonna kartop qajet. Atalǵan kólem qazirdiń ózinde daıyn tur. Al sábiz tuqymy kóktemgi egis jumystarynyń kólemine qaraı satyp alynady.
Buǵan deıin Ertis boıynyń fermerleri sábiz eksportyna shekteý engizbeýdi suraǵan edi.