Pavlodar kóshelerinde bet-álpetti tanıtyn beınekameralar ornatylyp jatyr
PAVLODAR. KAZINFORM — Oblys ortalyǵyndaǵy kóshe qıylystary men jaıaý júrginshiler jolyna «Mergen» beınebaqylaý kameralary qoıylyp jatyr. Ol jol qozǵalysyn baqylaýmen qatar, adamnyń bet-álpetin tanyp, tútin shyqqanyn, bógde zattardyń qaldyrylǵanyn habarlaı alady.
Pavlodar oblysynda kóshelerdi beınebaqylaý kameralarymen qamtamasyz etý júıesi bastalyp ketti. Qoǵamdyq qaýipsizdik tujyrymdamasy sheńberinde «Qaýipsiz qala» úsh jyldyq jobasy iske asyrylatyn bolady. Bir ǵana Pavlodar qalasynda 3 myń kamera qoıylmaqshy.
— Joba aıasynda óńir boıynsha 5000-ǵa jýyq kamera ornatý josparlanǵan. Onyń ishinde Pavlodar qalasynda 3000 jalpy beınebaqylaý kamerasy, Pavlodar, Aqsý jáne Ekibastuz qalalaryndaǵy jelilik ýchaskelerde 250 apparattyq-baǵdarlamalyq keshen, 150 qıylysta apparattyq-baǵdarlamalyq keshender, sondaı-aq respýblıkalyq trassalardyń jol apaty jıi qaıtalanatyn tustarynda 20 apparattyq-baǵdarlamalyq keshen qoıylady. Beınebaqylaý júıesi boıynsha jobany «Antarium Group» JShS utyp aldy. Kompanııamen 3 jylǵa servıstik model boıynsha jalpy somasy 8,5 mlrd teńgege shart jasaldy, — dep habarlady óńirlik tsıfrlyq tehnologııalar basqarmasynyń basshysy Aǵybaı Ámirın.
Kóshe qıylystary men jaıaý júrginshiler joldaryna qoıylatyn «Mergen» apparatyq-baǵdarlamalyq kameralary taný analıstıkasyna ıe. ıAǵnı jyldamdyǵyn shekten tys arttyrǵan jáne baǵdarshamnyń tyıym salynǵan túsine ótken kólik quraldaryn tirkep, adamnyń bet-álpetin tanı alady. Sondaı-aq kóshede qaldyrylǵan zattardy, tútinniń shyǵýyn anyqtaıdy. Tipti kólik ishinde qaýipsizdik belbeýin taqpaǵan, rólde telefonmen sóılesip otyrǵan adam týraly da habarlaı alady.
— Kameralar eń áýeli shaharlardaǵy jol qaýipsizdigin qamtamasyz etý úshin qoıylyp jatyr. Jaıaý júrginshilerdi ótkizbegen júrgizýshilerdi anyqtap, ári qaraı jol polıtsııasynyń tıisti mekemelerine avtomatty túrde málimet jiberedi. Qazirgi ýaqytta oblys ortalyǵynda montajdaý jumystary júrgizilip jatyr. Jetkizýshi kompanııa parallel elektr qýatyna qosylý úshin ruqsat qujattaryn alady. Barlyq kamera polıtsııa departamentiniń jedel basqarý ortalyǵyna jalǵanady, — dep túsindirdi basqarma basshysy.
Kameralardy ornatý oryndary polıtsııa departamentimen jáne basqa da quqyq qorǵaý organdarymen anyqtalǵan. Eń áýeli beınebaqylaý múlde bolmaǵan aýmaqtar qamtylyp jatyr.
Pavlodar oblysy jergilikti polıtsııa qyzmeti basqarmasy bastyǵynyń mindetin atqarýshy Azamat Kúrkebaev oblys ortalyǵynda kólik apattary jıi bolatyn 7 jol qıylysyna da «Mergen» keshenderi qoıylǵanyn jetkizdi. Tártip saqshylary jyldamdyq rejımin baqylaıtyn kameralar yqtımal apattardy barynsha azaıtady degen úmitte. Keshender Nazarbaev — Toraıǵyrov, Nazarbaev — Estaı, Nazarbaev — Ak. Shókın, Nazarbaev — Amangeldi, Elgın — Aımaýytov. Elgın — Gerıng, Jibek joly — Malaısary batyr kósheleri qıylystarynda ornnatylǵan. Jaqyn arada jumys isteı bastaıdy.
Memleket basshysy bıylǵy Joldaýynda Qazaqstan aldaǵy úsh jyl ishinde mindetti túrde jappaı tsıfrlyq el bolýy kerek degen mindet qoıǵany málim.
Buǵan deıin Aqsý men Ekibastuz qalalarynda erteńnen bastap avtomattyq baqylaý júıeleri iske qosylatynyn jazǵanbyz