Pavlodar qos halyqaralyq áýe reısi úshin tranzıtke aınalady

Pavlodar oblysynyń delegatsııasy Qazaqstan men Reseıdiń óńiraralyq yntymaqtastyq forýmynda óńirdiń kólik-logıstıkalyq áleýetin tanystyrý barysynda basym baǵyttardyń biri - avıatsııalyq ınfraqurylymdy damytý ekenine toqtalǵan. 

- Pavlodar áýejaıynyń ushý-qoný jolaǵyn rekonstrýktsııalaý jumystary aıaqtalǵannan keıin, bıylǵy qyrkúıekte Omby-Pavlodar-Tashkent jáne Novosibir-Pavlodar-Tashkent baǵyttary boıynsha halyqaralyq tranzıttik áýe reısterin ashý josparlanyp otyr, - dep habarlady oblystyq ákimdikten. 

Sondaı-aq halyqaralyq «Soltústik-Ońtústik» kólik dálizin damytýǵa erekshe nazar aýdarylyp otyr. Ózen logıstıkasynyń tıimdiligin arttyrý maqsatynda Pavlodar ózen portynda qosymsha aılaqtyń qurylysy aıaqtalǵan. Ertiste kólemi 1,2 mln tekshe metrden asatyn ózen túbin tereńdetý jumystary jalǵasýda. Sonymen qatar «Atameken-Ertis-Rýsskaıa Polıana» avtokólik jolyn kúrdeli jóndeý jumystary aıaqtalýǵa jaqyn.

Memleket basshysynyń tapsyrmasy boıynsha bıyl kúzde respýblıkalyq mańyzy bar «Qyzylorda-Pavlodar-Ýspenka-Reseı Federatsııasynyń shekarasy» avtokólik jolyndaǵy Ertis ózeni arqyly ótetin jańa kópirdi ashý josparlanýda.

Bul joba júk kólikteriniń júrý baǵytyn 60 shaqyrymǵa deıin qysqartýǵa múmkindik beredi. 
Sonymen qatar «Qosaq», «Sharbaqty» jáne «Úrlitúp» halyqaralyq avtokólik ótkizý beketterin jańǵyrtý jumystary jalǵasýda.