Pavlodar kommýnısteri sybaılas jemqorlyqqa qarsy kúres sharalaryn usyndy
Іs-sharaǵa aýyl sharýashylyǵy, kásipkerlik jáne saýda, aqparat jáne qoǵamdyq damý basqarmalarynyń, sybaılas jemqorlyqqa qarsy is-qımyl agenttigi oblystyq departamentiniń, sondaı-aq óńirlik kásipkerler palatasynyń ókilderi, sharýa qojalyqtarynyń basshylary, qoǵam qaıratkerleri men partııa belsendileri qatysty.
Oblystyq komıtettiń hatshysy Gaýhar Nuǵmanovanyń aıtýynsha, sybaılas jemqorlyq taqyryby Qazaqstan ekonomıkasynyń barlyq salasyna qatysty. Sondyqtan tipti oblystyq deńgeıdegi sheshimder de ulttyq baǵdarlamalardy ázirleýge negiz bola alady.
Qoǵamdyq pikirtalas barysynda sybaılas jemqorlyqtyń paıda bolýy, taralý sebepteri jáne onyń qoǵam, ekonomıka, kásiporyndar, uıymdar, kásipkerler úshin teris saldary talqylandy. Sybaılas jemqorlyqqa qarsy is-qımyl boıynsha memlekettik jáne jergilikti deńgeıde qandaı sharalar qabyldaý qajet ekendigi týraly sóz qozǵaldy. Talqylaý barysynda reıderlik, josyqsyz básekelestik, sharýa qojalyqtarynyń aýyl sharýashylyǵy ónimderin satý máseleleri qarastyryldy. Ónimderdi satýda deldaldardyń degeni júrip turǵany jasyryn emes. Memlekettik organdar men memlekettik satyp alýlar qyzmetiniń ashyqtyǵy, bıznes úshin ákimshilik kedergilerdi joıý máselesi de qozǵaldy.
Zańtaný professory, táýelsiz sarapshy Vıktor Jamýldınov normatıvtik-quqyqtyq aktilerdi jetildirý jáne zańǵa táýeldi aktilerdi retteý qajettiligi týraly usynys aıtty. Óıtkeni qarapaıym adamdar zań negizderin árdaıym túsine bermeıdi. Máselen, sońǵyda alkogol men temeki ónimderin satyp alý kezinde tipti egde jastaǵy adamdar da jeke kýálikti kórsetetin boldy. Shyn máninde, bul negizsiz talap.
Oblystyq aqparat jáne qoǵamdyq damý basqarmasy basshysynyń orynbasary Dáýlet Zakarıanov bala kezden bastap paraqorlyq pen jemqorlyqqa amal qarastyrý kerektigin aıtty. Mundaı tásilder skandınavııa elderinde qoldanylady eken. Onda sybaılas jemqorlyqqa shylanǵan adam qoǵamnyń jıirkenishin týdyrady. Jumysqa ornalasýda, jalpy qoǵamda jemqorlyqqa jol bergen adam problemalarmen betpe-bet keledi. Bizde sheneýnik para úshin sottalǵan bolsa da, ony merziminen buryn bosatýy múmkin nemese ol aıyppulmen shektelip, sodan keıin de basshylyq laýazymdardy atqara alady. Qazaqstandyq qoǵam mundaı faktilerge nemquraıly qaraıdy jáne múlde úırenip ketti dese de bolady.
Sharýa qojalyǵynyń basshysy Serik Qarıev sybaılas jemqorlyqtyń kóptegen formaldylyqtardan, nusqaýlyqtar men erejelerden týyndaıtynyna nazar aýdardy. Fermer naryqta et satý úshin veterınarlyq, sanıtarlyq-epıdemıologııalyq qyzmetten jáne basqa da kóptegen organdardan anyqtamalardy jınaýy kerek. Barlyq talaptar men nusqaýlardy oryndaý múmkin emes. Sondyqtan qalaıda «kelisý» kerek. Mundaı jaǵdaı túrli salada kezdesedi. Tamaqtaný oryndarynyń ıeleri meıramhana ashyp, jumys isteý úshin «tozaqtan» ótýge týra keledi. Órt ınspektsııalary, sanıtarlyq dárigerler jáne basqa da qyzmetter, ekologtarǵa deıin aqylǵa syımaıtyn talaptar qoıady.
– Oblystyń partııalyq aktıviniń mindeti – barlyq kásipkerlerge ádil jaǵdaı jasaý úshin zańnamany ózgertýge negiz bola alatyn aqparatty jınaý jáne taldaý. Sonymen qatar, keıbir jergilikti máselelerdi qoǵamdyq pikirtalastar formatynda sheshýge bolady. Óıtkeni múddeli vedomstvolardyń ókilderi dál sol jerde shoǵyrlanǵan, – dedi Gaýhar Nuǵmanova sóz sońynda.
Іs-sharanyń qorytyndysy boıynsha atqarýshy organdar úshin usynymdar ázirlendi. Sondaı-aq Qazaqstan Kommýnıstik Halyq partııasynyń Ortalyq komıtetine tıisti aqparat daıyndaldy.
