«Pavlodar» klýby voleıboldan alǵash ret el chempıony atandy

ASTANA. QazAqparat – Pavlodar qalasynda voleıboldan erlerdiń Ulttyq lıga komandalary arasynda HHHІ QR birinshiliginde el chempıony anyqtaldy, dep habarlaıdy QazAqparat tilshisi.

Chempıonat qorytyndysynda belgili maman Igor Nıkolchenko jattyqtyratyn «Pavlodar» voleıbol klýby úzdik shyqty.

Jarystyń negizgi bóligin úshinshi orynmen támamdaǵan pavlodarlyqtar pleı-off básekesinde áýeli Almatynyń «Býrevestnık» komandasyn tize búktirdi.

Altyn júlde úshin básekede «Pavlodar» men ótken jylǵy el chempıony «Atyraý» komandasy kezdesti. I.Nıkolchenko shákirtteri asa tartysty birinshi matchta qarsylasyn 3:2 (26-24, 25-23, 28-30, 17-25, 16-14) esebimen utty. Ekinshi oıyn da bes partııamen (20-25, 25-20, 19-25, 25-18, 15-11) aıaqtalyp, pavlodarlyqtardyń mereıi ústem boldy. Sóıtip, olar óz tarıhynda alǵash ret el chempıony ataǵyn jeńip aldy.

Kúmis júldeni «Atyraý» qanaǵat tutsa, «Býrevestnık» úzdik úshtikten kórindi. Almatylyqtar «Taraz» klýbyn eki ret 3:0 esebimen jeńdi.

Kókshetaýdyń «Ushqynyn» eki márte súrindirgen «Esil SK» (Petropavl) besinshi orynǵa turaqtady.

Osy matchtar serııasy qos oıynmen aıaqtalsa, jetinshi jáne segizinshi oryn ıeleri beısenbi kúni anyqtalady. Óskemenniń «Altaıy» birinshi básekede «Jaıyqtan» 3:0 esebimen basym tússe, oraldyqtar keshe ese qaıyrdy (3:1). Eki komanda arasynda búgin sońǵy match ótip, chempıonat qorytyndylanyp, úzdikter marapattalady.

Eske sala keteıik, budan buryn áıelder arasynda «Altaı» komandasynyń qatarynan jetinshi ret Qazaqstan chempıony atanǵanyn jazǵan bolatynbyz.