Pavlodar kásiporyndary jasandy ıntellektini óndiriske tıimdi engizip jatyr
ASTANA. KAZINFORM – Pavlodar oblysynda energetıka, metallýrgııa, munaı-hımııa jáne mashına jasaý salalaryndaǵy jetekshi kásiporyndar shoǵyrlanǵan. Bul kásiporyndar ishki jáne syrtqy naryqqa janarmaı, elektr energııasy, alıýmınıı jáne kómir jetkizedi.
Oblys ákimi Asaıyn Baıhanov óńir damýynyń basym baǵyttary Memleket basshysynyń 2022 jylǵy jumys saparynda aıqyndalǵanyn aıtady.
- Birinshisi – óńir ekonomıkasyn ártaraptandyrý jáne damytý. Ekinshisi – adamı kapıtaldy damytý. Úshinshisi – ekologııalyq ahýaldy jaqsartý. Tórtinshisi – kólik ınfraqurylymyn damytý. Al besinshi baǵyt – turǵyndar úshin qolaıly ári jaıly orta qalyptastyrý, - deıdi ol.
«Pavlodar munaı-hımııa zaýyty» JShS jóndeý-mehanıkalyq tsehiniń basshysy Jasulan Aıdarǵalın 2011–2017 jyldardaǵy aýqymdy jańǵyrtý kásiporynnyń jumysyna jańa serpin bergenin aıtady.
- Eki tehnologııalyq nysan salynyp, paıdalanýǵa berildi. Olar – nafta splıtterinen ızomerleý qondyrǵysy jáne kúkirt óndirý kesheni. Nafta splıtterinen ızomerleý qondyrǵysy tómen oktandy benzındi, munaıdyń benzın fraktsııalaryn qaıta óńdep, joǵary oktandy benzınge aınaldyrady. Bul zamanaýı ishten janatyn qozǵaltqyshtarǵa asa qajet. Janarmaıdyń ekologııalyq klasyn KA-2-den KA-4-ke kóterý munaı ónimderin tereńirek tazalaýdy talap etti. Osy nátıjege jetýde jańa kúkirt óndirý kesheni sheshýshi ról atqardy, - deıdi Jasulan Aıdarǵalın
«Qazaqstan elektrolız zaýyty» AQ elektrodtar óndirisi tsehiniń basshysy Rınat Qapanov 2023 jyly kúıdirý peshine kúrdeli jóndeý júrgizilgenin aıtady.
- 2024 jyly peshtiń ot jaǵatyn qondyrǵylary tolyqtaı jańǵyrtyldy. Qazir bizdiń pesh tolyq jańardy deýge bolady. Qazir álemdik úrdisterge saı rejımde jumys istep tur. Sondyqtan ár ýchaskede, ár tsehta avtomattandyrý men jetildirý júrip jatyr, - deıdi tseh basshysy.
«Bogatyr Kómir» JShS ókili Asylbek Nurǵalıev bul kásiporynda da zamanǵa saı jetildirý jumystary úzdiksiz protseske aınalǵanyn aıtady.
- Jyl saıyn avtosamosvaldar parki jańartylyp otyrady. Byltyr Hitachi EH1700 sanatyndaǵy samosvaldar men 5 tehnıka satyp aldyq. Bizdiń kólik parki jyl saıyn tolyqtyrylyp, jańaryp otyrady. Bul óndiris kóleminiń arttyrady. Qazir joldardy keńeıtý jumystary júrgizilip jatyr, barlyǵy osy samosvaldarǵa beıimdelgen. Bizdiń kenishtiń ónimdiligi jyl saıyn artyp keledi, - deıdi ol.
«Kompanııa Neftehım LTD» JShS tehnıkalyq dırektory Sergeı Dadyka kásiporynda jańa markaly polıpropılen men onyń negizindegi kompaýndtardy ıgerý kózdelip otyrǵanyn málim etti.
- Sonymen qatar óndiristi tsıfrlandyrý boıynsha birqatar qadam jasalyp jatyr. Onyń ishinde biryńǵaı dıspetcherlik basqarý pýltin qurý qarastyrylǵan. Kásiporyn qaıtalama plastıkterdi qaıta óńdeý jáne olardan ónim shyǵarý sharalaryn kúsheıtip jatyr, - deıdi zaýyt basshysy.
Pavlodar munaı-hımııa zaýyty – Qazaqstan halqyn janarmaımen qamtamasyz etip otyrǵan úsh iri zaýyttyń biri. Zaýyttaǵy qurylys-jóndeý tsehiniń basshysy Álibek Qojasov kásiporyn sarqyndy sýdy barynsha qaıta paıdalanýǵa múmkindik beretin súzý stantsııasy ornatalyǵanyn, sýmen jabdyqtaý jáne káriz tsehtary jańartylǵanyn aıtady.
Indýstrııalyq aımaqta jastardy óndiriske beıimdeý jumysy júıeli júrgiziledi. Sebebi dástúrler sabaqtastyǵy bolmasa, jetekshi kásiporyndar maman tapshylyǵynan zardap shegýi múmkin.
«Bogatyr Kómir» JShS soltústik kesheniniń dırektory Aleksandr Kıtov kompanııa jas mamandardy qushaq jaıa qarsy alatynyna sendirdi.
- Kompanııada «Jastalap», «Órleý» sekildi oqytý baǵdarlamalary bar. Jańa qabyldanǵan qyzmetkerlerdi, jumysshy mamandyq ıelerin ınjenerlik-tehnıkalyq qyzmetkerlerge qaıta daıarlaý júrgiziledi. Sondaı-aq, turǵyn úıge qatysty baǵdarlamalarymyz bar, paıyzsyz qarjylaı tólemder qarastyrylǵan, - deıdi ol.
Al «Energy Solutions Center» JShS mamandardy ujymdaǵy jalaqyny 30 paıyzǵa kóterý arqyly yntalandyrypty.
- Jalaqyny 30%-ǵa kóterýmen shektelmeı, kásipodaq qurdyq. Qazirgi oǵan barlyq qyzmetkerdiń 99%-y múshe, - deıdi bas dırektordyń orynbasary Nurlan Jarkenov.
Óńirde dýaldy oqytý júıesi jolǵa qoıylǵan. «Kompanııa Neftehım LTD» JShS basshysynyń polıpropılen óndirisi jónindegi orynbasary Danııar Kazezov kompanııada jastarǵa tehnologııalyq protsesti úıretetin óndiristiń úzdik mamandary men tálimgerleri bar ekenin aıtady.
Aımaq basshysy Asaıyn Baıhanov óńirdiń kásibı-tehnıkalyq bilim berý júıesi eń úzdikterdiń biri bolǵanymen, zamanaýı tehnologııalardy engizý turǵysynan jetildiretin tustar barshylyq ekenin aıtyp otyr.
- Qazir óndiristik alpaýyttarymyz robottandyrýdy damytyp, jasandy ıntellektini keńinen engizip jatyr. Sondyqtan bizdiń óńirdiń kásibı-tehnıkalyq bilim berý júıesi eńbek naryǵynda qalyptasyp jatqan osy úrdisterge ilesýge tıis, - deıdi oblys ákimi.
Qazaqstannyń jetekshi ındýstrııalyq ortalyqtarynyń birine aınalǵan qala týraly tolyǵyraq Prezıdent TRK Derekti kıno ortalyǵy túsirgen «Pavlodar: Óńir tynysy» derekti fılminen kóre alasyzdar.
Aıta keteıik, Pavlodarda sút óndirisiniń kólemi 31,5 myń tonnaǵa artty.