Pavlodar kásipkerleri kúnnen qýat alyp, qarańǵyda jaryq shashatyn plıta óndiredi
PAVLODAR. QazAqparat - Pavlodarlyq kásipkerler Talǵat Jumataev pen Qaırat Tileýlen kúndiz kúnnen qýat alatyn plıta arqyly landshaft dızaıny salasynda noý-haý engizýdi qolǵa aldy. Bul týraly oblystyq kásipkerler palatasynyń baspasóz hatshysy Dına Ábildınova aıtty, dep habarlaıdy pavlodarnews.kz.
«Jumataev» jeke kásipkerligi palataǵa bıznes-ıdeıasymen júgingen bolatyn. Menedjerler men keńes berýshi mamandar bıznes-jospar quryp, jobany júzege asyrýdyń barlyq kezeńinde kómek kórsetti. Nátıjesinde «Bıznes-mektep» kýrsynan bilim alǵan ol grantty qarjylandyrýǵa úmitker retinde qatysyp, óz jobasymen jeńimpaz atandy, deıdi Dına Ábildınova. Sarapshylardyń pikirine súıensek, mundaı plıtanyń qasıeti 200 jylǵa deıin saqtalady jáne quramynda fosfor joq. Sondyqtan aınalany qorshaǵan ortaǵa eshbir qaýip tóndirmeıdi. Tabıǵı jáne syrtqy faktorlarǵa tózimdi bolyp keledi.
Qurylys materıaldaryn óndirýde tájirıbesi bar qos kásipker qabyrǵa jáne qum bloktaryn, shlakbloktaryn shyǵarýmen aınalysady. Sonymen qatar, qurylys materıaldaryn satýdyń qyr-syryn meńgergen. Jobany júzege asyrý úshin jeke menshiginde ǵımarat ta bar.
«Qazirgi tańda energııa únemdeıtin jaıaýjol plıtkasynyń mańyzy zor. Bul «Energııa únemdeý - 2020» memlekettik baǵdarlamasyna sáıkes keledi. Elektr energııasyn tutynbaıtyn ekologııalyq taza ónim. Sondaı-aq, jaryqdıodty ónimder sanatyna jatpaıdy, sebebi energııa talap etpeıdi. Kúndiz qarapaıym beton plıta sııaqty bolyp kórinedi de, kesh batqanda jaryq shashyp turady»,- deıdi Talǵat Jumataev.
Kásipker elimiz boıynsha mundaı óndiristiń balamasy joq ekenin aıtady. Sondyqtan kún qýatyn sińiretin plıtamen búkil eldi qamtýdy kózdep otyr. Energııa únemdeıtin jaıaýjol plıtasy kúni boıy jaryqty sińirip, qarańǵyda sony jaryq retinde aq-jasyl túste shashyp turady. - Turǵyndar keshki ýaqytta jaryq beretin jolmen serýendegende ertegi álemine tap bolǵandaı kúıge enedi, - deıdi ol. - Ǵajaıyp áserdi jaıaýjolǵa arnalǵan iri jáne usaq plıtalaryn mozaıka retinde tósep nemese shetine úılestirý arqyly kúsheıtýge bolady. Keshki ýaqytta polımerlik usaq bólshekterdiń nyǵyzdalýynan jaryq bólinedi. Mundaı jaryq turǵyndardy ǵana emes, qala qonaqtaryn da tań qaldyratyny anyq. Osy óndiristi iske qosý arqyly qala kórkine eshbir shyǵynsyz-aq jańa ınnovatsııalyq kórik bere alamyz».
Aıta keteıik, kásipkerler reseılik zaýytpen «Lýna» jarqyraıtyn jaıaýjol plıtasynyń tehnologııasyn qoldaný maqsatynda dılerlik kelisim jasaǵan.
