Pavlodar qalasynyń kireberis joldarynda blokposttar jumysyn bastady
PAVLODAR. QazAqparat – Pavlodar qalasynyń kireberis joldaryna qoıylǵan baqylaý-ótkizý beketteri sáýirdiń 12-inen 13-ine qaraǵan túni jumysyn bastady, dep habarlaıdy QazAqparat.
Pavlodar oblysynyń ákimi Ábilqaıyr Sqaqov blokposttarǵa baryp, olardyń jumysqa daıyndyǵyn baǵalady.
Aımaq ákiminiń baspasóz qyzmetinen málim etkendeı, óńirde barlyǵy 9 baqylaý-ótkizý beketi qoıyldy: beseýi Pavlodar qalasynda jáne eki-ekiden Aqsý men Ekibastuz qalalarynda. Barlyq aýdandarda mobıldi beketter qyzmet etedi. Sol arqyly ishki kóshi-qondy azaıtý josparda bar.
«Óńir basshysy oblys ortalyǵyna kireberistegi Lenın kenti men Pavlodarskoe aýyly mańyńdaǵy baqylaý-ótkizý beketterinde boldy. Bul jerde ótetin ár kólik tekseriledi. Ákim beketterdiń tehnıkalyq jabdyqtalýy men qyzmetke daıyndyǵyn qadaǵalady. Polıtsııa qyzmetkerleri «jasyl jol» boıynsha ótetin kásiporyndar men kólik tizimin tikeleı qaraý múmkindigi bar planshettermen jabdyqtalǵan», - delingen ákimdik aqparatynda.
Ábilqaıyr Sqaqov kólikterdi ótkizý jumysy barynsha tez ári tıimdi bolýyn talap etti. Sonymen qatar, ol barlyq blokposttardyń jumysyn úılestirýdi tapsyrdy. Bul barlyq kólik qozǵalysyn baqylaý úshin kerek.
Aıta ketsek, aımaqta https://pvlinfo.kz/ saıty iske qosyldy, onda jumyskerler tizimi bar ótinishter jáne jumys ornynan beriletin anyqtamanyń elektrondyq úlgisi ornalastyrylǵan. Bul aqparat karantın kezinde júrip-turýǵa ruqsat berý úshin memlekettik organdarǵa jiberiledi.
