Pavlodar qalasynyń aýmaǵy 10 myń gektarǵa deıin keńeıedi

Bul týraly búgin oblystyq máslıhattyń VIII sessııasynda belgili boldy, dep habarlaıdy pavlodarnews.kz.

 Búgin depýtattarmen maquldanǵan oblys ortalyǵynyń bas josparynda qalanyń 2032 jylǵa deıingi damýy qarastyrylǵan. Bul qujatta damý kezeńiniń negizgi ólshemderi, halyq sany, turǵyn úıi qurylysynyń kólemi, kólik kesheni men ınjenerlik ınfraqurylym damýynyń negizgi baǵyttary, kóriktendirý men kógaldandyrý belgilengen. Qazirgi tańda qalada 356,2 myń adam turady. 2020 jyldyń sońynda halyq sany 384 myńǵa, al, 2032 jyly 412 myńǵa jetedi dep kútilýde. Qalanyń turǵyn úı qory 9,6 mln sharshy metrge deıin jetip, jeke turǵyn úı qurylysynyń úlesi jańa qurylys kóleminiń 45 paıyzyn quramaq. Birinshi kezekte «Dostyq» jáne Alıýmınstroı shaǵynaýdandaryn qaıta qalypqa keltirý jumystaryn aıaqtaý qarastyrylǵan. - Jeke turǵyn úı qurylysyn súrý esebinen qalypqa keltirý jumystaryn júrgizý kópqabatty turǵyn úı qurylysyn damytýdyń negizgi joly bolyp sanalady. Jańa qurylys kólemi 2032 jylǵa deıin shamamen eki mln sharshy metrdi quraıdy. Qalanyń Pavlodarskoe, Moıyldy, Jetekshi, Baıdaly, Kenjekól aýyldyq aımaqtary men Temir jol jáne Lenın kentterinde jeke qurylys júrgizý josparlanǵan, - dedi arhıtektýra jáne qala  qurylysy basqarmasy basshysynyń m. a. Shyńǵys Nuramaǵanbetov.

Bas josparda kólik jáne kóshe men joldar jelisiniń biryńǵaı júıesi qarastyrylǵan. Pavlodardyń aınalasyndaǵy magıstraldarǵa jańa avtojol salý kózdelip otyr. 1 Mamyr kóshesinde tolyq qaıta qurý jumystary nátıjesinde Ak. Sátbaev jáne Kýtýzov kóshelerinde aýanyń lastanýy tómendeıdi. Bir baǵyttaǵy 1 Mamyr joly qos toraptyq jolǵa aınalady. Pavlodardyń bas josparyn depýtattar maquldap, bul qujat Ulttyq ekonomıka mınıstrligine keshendi saraptama jasaýǵa tapsyrylady. Bas jospar 10-15 jylǵa daıyndalady.  Qazirgi bas jospar 2005 jyly ázirlengen jáne qalanyń damýy 2015 jylǵa deıin qarastyrylǵan.