Pavlodar qalasynyń ákimi jastarmen birge 100-den astam qap qoqys jınady
PAVLODAR. QazAqparat - Pavlodar qalasynyń ákimi Ánýar Kúmpekeev jastarmen birge senbilikke qatysyp, shara sońynda kezdesý ótkizdi, dep habarlaıdy pavlodarnews.kz.
Ýsolka shaǵyn aýdanyndaǵy Ertis ózeniniń sol jaǵalaýynda qala ákimi men jastar qaýymy senbilik ótkizdi. Shahardaǵy 20-dan astam jastar uıymynyń jetekshileri men belsendileri qala basshysymen birge 2 saǵattyń ishinde adamdar tabıǵat aıasynda demalyp, tastap ketetin 100-den astam qap qoqys jınastyrdy.
Senbiliktiń aıaǵy Ánýar Kúmpekeevtiń qala jastarymen alǵashqy kezdesýine ulasty. Kezdesýde jastar arasyndaǵy ózekti máseleler talqylanyp, olardyń birshamasy sheshiletini aıtyldy.
«Jastardyń suraýy boıynsha qalalyq saıabaqtyń qasyndaǵy shyǵyrshyq tebetin alań jóndeletin bolady», - dedi qala ákimi.
«Sondaı-aq, jastar qysqy ýaqytta kórermender otyratyn orny bar, tolyq qamtylǵan fýtbol oınaıtyn jabyq nysan salýdy ótindi. Bul másele qalamyzda burynnan kóterilgen. Merdiger uıym jumysqa kirisken. Múmkindiginshe bıyl paıdalanýǵa berýi kerek. Al, qalalyq «Jasyl eldikter» sarbazdar sanyn 500-ge kóbeıtýdi jáne jalaqylaryn arttyrýdy suraýda. Bul másele qarastyrylatyn bolady. Oń sheshimin tabýy tıis. Sonymen qatar, kezdesýde Ánýar Kúmpekeev jýyrda «Pavlodar eriktiler klýby» qaıyrymdylyq sharalarǵa shyǵý úshin kerekti shaǵyn avtobýstaryn alatynyn jetkizdi.
Shara sońynda qala ákimine «Deni saý ult» qoǵamdyq qorynyń jetekshisi Aısa Qabdýlın kezdesýge kelgen barlyq jastardyń qoltańbasy qoıylǵan fýtbol dobyn tabys etti.
Foto: JBDO/pavlodarnews.kz
