Pavlodar qalasynda ótken ІT forýmynda zamanaýı tehnologııalar tanystyryldy
Forýmǵa oblys ákimi Bolat Baqaýov pen QR tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev qatysty.
«Pavlodar oblysynyń tsınflandyrý boıynsha kóshbasshyǵa aınalýyna barlyq múmkindigi bar. Óńirimizde óndiristik alpaýyttar ornalasqan. Joǵarǵy oqý oryndarymyzdyń ǵylymı qabileti joǵary. Barlyq jobalar halyqtyń ómir súrý deńgeıin kóterý maqsatynda jasalady», - dedi oblys ákimi.
Óńir basshysynyń aıtýynsha, oblystaǵy kásiporyndar belsendi túrde «Tsıfrly Qazaqstan» baǵdarlamasyna qosylǵan. Innovatsııalyq tehnologııalar boıynsha óńirde 40-qa jýyq joba júzege asyrylýda. 2018 jyly 1,1 mlrd teńgeden astam qarjyǵa 10 joba engizildi. QR tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev óńirdegi aqparattyq tehnologııalardyń damý úrdisine joǵary baǵa berdi.
«Tsıfrly Qazaqstannyń» nátıjesin qazirgi kezde árqaısymyz kórip júrmiz. Biraq áli de damýdyń alǵashqy kezeńindemiz. Pavlodar oblysy da bul baǵytta aýqymdy jumys jasap keledi. Jobalardyń júzege asýy úshin ınternettiń qoljetimdiligi mańyzdy ekeni anyq. Qalalarymyzda sapaly ınternet bar bolǵanymen, aýyldyq jerlerde bul máselege aınalyp tur. Sondyqtan «Tsıfrly Qazaqstan» aıasynda eldi mekenderde sapaly ınternet engizý bastalǵan. Búgin Pavlodardaǵy Shaqat aýylynda bul baǵyttaǵy jobanyń qalaı iske asyrylyp jatqanyn kóretin bolamyz», - dedi Asqar Jumaǵalıev.
Sonymen qatar, pavlodarlyqtar mınıstrge zamanaýı tehnologııalardy tanystyrdy. Solardyń biri TKR kompanııasy – jattyǵý qurylǵylaryn, ınteraktıvti modýlder men oqytýǵa arnalǵan júıeler qurastyrý, zamanaýı 3D tehnologııalar arqyly túrli qurylǵylardy kórsetýmen aınalysady.
«Bizdiń baǵdarlamalar arqyly túrli baǵyttaǵy mamandyqtardy kórsetip, derekterdi ınteraktıvti berý arqyly kez kelgen deńgeıdegi iske úıretýge bolady. Júıe arqyly ómirde bolatyn ártúrli jaǵdaılardy vırtýaldy túrde engizýge bolady. Mysaly, bir oqý oryny John Deere tehnıkasymen jumys jasaýǵa oqytýy múmkin. Kelesi bir bilim ordasy basqa tehnıkamen úıretedi. Biz vırtýaldy álemde sol tehnıkany qurastyramyz. Keıin stýdentter jasalǵan tehnıkamen tájirıbeden ótedi. Oqý bitirgen soń sol sharýashylyqqa baryp, emin-erkin jumys jasaı alady. Biz ár tapsyrys berýshige jeke baǵdarlama qurastyramyz. Jobamyz 300 myń teńgeden joǵary birneshe mıllonǵa jetýi múmkin. Kóbinese bilim berý uıymdary men iri kásiporyndardan suranys túsedi, - dedi kompanııanyń bas dırektory Makar Arlıapov.
Qazirgi ýaqytta TKR kompanııasynyń
jobasyn pavlodarlyq alıýmınıı zaýyty paıdalanýda. Olar baǵdarlama arqyly
qyzmetkerlerin oqýdan ótkizedi. Sonymen qatar, kompanııa TMD boıynsha birneshe
elmen jumys jasaýda.