Pavlodar qalasynda 56 strıtbol alańy salynady
NUR-SULTAN. QazAqparat - Mamyr aıynyń ortasyna deıin Pavlodar qalasynda 56 strıtbol alańy salynady, dep habarlaıdy pavlodarnews.kz.
Dál qazir mundaı jumystardyń biri Toraıǵyrov kóshesindegi №6 úıdiń janynda júrgizilýde. Pavlodar qalalyq dene shynyqtyrý jáne sport bóliminiń basshysy Kúmisaı Asaıynovanyń aıtýynsha, óńirde buqaralyq sportty damytýǵa erekshe kóńil bólinip keledi.
Qazirgi ýaqytta turǵyndardyń salaýatty ómir saltyn ustanýy úshin barynsha jaǵdaı jasalýda.
- Sport alańdaryn ornatý boıynsha merdigerlermen kelisimshart jasaldy. Bıyl barlyǵy 56 strıtbol alańy paıdalanýǵa beriledi. 10-ǵa jýyq alań rezervte tur. Búginge deıin dál osyndaı 21 alań salyndy. Qalǵan alańdardyń qurylysy mamyr aıynyń ortasynda aıaqtalady dep kútilýde, - deıdi ol.
Bólim basshysy oblys ortalyǵyndaǵy balalar oınaıtyn 94 alańnyń da jańartylatynyn aıtady. Qazirgi ýaqytta onyń 20-sy jóndeýden ótken.
Sondaı-aq, fýtbol alańyn qurý boıynsha konkýrs jalǵasýda. Eger mamyr aıynyń basynda merdigermen kelisimshart jasalsa, maýsym aıynyń sońyna deıin qalada 23 shaǵyn fýtbol alańy salynatyn bolady.
Degenmen, keıbir turǵyn úılerdiń aýlalarynda úlken kólemdegi fýtbol alańdaryn salýǵa múmkindik joq. Sondyqtan ondaı jerlerge 14x26 kólemdegi alań ornatylady.
