Pavlodar qalasy 2020 jyly qalaı túrlenbek
PAVLODAR. QazAqparat – Pavlodar ákimdiginde 2020 jyly qalany abattandyrý jumystary talqylandy. Keńeske oblys ákimi Bolat Baqaýov qatysty, dep habarlaıdy QazAqparat.
Otyrysqa sondaı-aq memlekettik organdardyń basshylary, kommýnaldyq sala qyzmetkerleri men qoǵamdyq uıymdardyń ókilderi qatysty. Qala ákimi Qaırat Núkenovtiń aıtýynsha, bıylǵy jyly 36 kóshege asfalt tóseletin bolady. Bul jumystarǵa 1,2 mıllıard teńge qarastyryldy. Sonymen qatar, Amangeldi jáne Dımıtrov kóshelerin keńeıtý josparlanyp otyr. Amangeldi kóshesi 1 Maı kóshesinen Nazarbaev dańǵylyna deıin, Dımıtrov kóshesi Qamzın kóshesinen Pavlov kóshesi aralyǵynda keńeıetin bolady. Uly oıshyl Abaı Qunanbaıulynyń 175 jyldyǵyna oraı Pavlodarda aqynnyń esimi berilgen kósheni abattandyrý josparlanyp otyr.
«Bul jumys úshin siz jeke jaýap beresiz. Kósheni ǵana kóriktendirip qoımaı, munda ornalasqan úılerdiń syrtqy kelbetine de mán berý kerek. Ol úshin ár úı ıesimen jeke sóılesip, osy máseleni talqylaý qajet. Turǵyndar óz úıleriniń qaqpasy, qorshaýy, shatyrlaryn jóndeýleri qajet. Bir aıdyń ishinde Abaı kóshesin kóriktendirý jumystary boıynsha naqty kontseptsııa qurylýy qajet», - dedi qala ákimine aımaq basshysy Bolat Baqaýov.
Sonymen birge, Pavlodar oblysynyń ákimi qalany jaryqtandyrý máselesin sheshýdi júktedi. Ol osy maqsattarǵa qajetti qarajatty taýyp berýge ýáde berdi. Aldyn ala eseptýler boıynsha qala kóshelerine jaryq shamdaryn ornatýǵa bir mıllıardtan astam qarjy kerek.
«Ókinishke qaraı, oblys ortalyǵyn abattandyrý tek bıýdjet pen demeýshiler qarjysynyń esebinen júrgizilip otyr. Kásipkerler bul jumystarǵa múldem qatyspaıdy. Ár bıznesmen óz kásibin ashqan aýmaqta, meıli ol, janar-jaǵarmaı stantsııasy, dúken nemese jeke aýlasy bolsa da, ol jerdi kóriktendirýge at salysýy kerek. Osy másele boıynsha ár kásipkermen jeke sóılesý qajet», - dedi Bolat Baqaýov.
Oblys ákimi temirjol beketi men vokzal mańyndaǵy alańnyń jaǵdaıyna nazar aýdardy. Onyń atap ótýinshe, «qala qaqpasyn» tıisti qalypqa keltirý qajet.
«Oblys ortalyǵyn kóriktendirý jumystary týraly jınalystardy aı saıyn ótkizip turamyn. Pavlodar – bizdiń ortaq úıimiz, ony kóriktendirý jumystaryna bılik te, qoǵam ókilderi de, kásipkerler men turǵyndar da birdeı at salysýlary qajet», - dedi ol.
