Pavlodar qalasynyń sýsyz qalý oqıǵasyna baılanysty tergeý júrip jatyr
PAVLODAR. KAZINFORM - Óńirlik atom jáne energetıkalyq qadaǵalaý jáne baqylaý komıtetiniń aýmaqtyq departamenti oblys ortalyǵynyń basym bóligin aýyzsýsyz qaldyrǵan apattyq jaǵdaı boıynsha tergeý júrgizip jatyr. Bul týraly Pavlodar qalasynyń basshysy Hasar Habylbekov habarlady.
21 maýsym kúni tańǵy ýaqytta «Pavlodar Vodokanal» JShS-niń balansyndaǵy sorǵy stansasynan aqaý shyǵyp, Pavlodar qalasynda sý berý jumystary shektelgen edi. Qalanyń basym bóliginde bir táýlikke jaqyn ýaqyt sý bolmady.
«Apat bolǵan kúni táýlik boıy qalpyna keltirý jumystary júrgizildi. Qazirgi ýaqytta qalaǵa sý berilip jatyr. Qolaısyzdyqtar úshin qala turǵyndarynan keshirim suraımyn. Pavlodar oblysy atom jáne energetıkalyq qadaǵalaý jáne baqylaý komıtetiniń aýmaqtyq departamenti atalǵan oqıǵa boıynsha tergeý júrgizedi»,– dep málimdedi qala ákimi Hasar Habylbekov.
«Pavlodar Vodokanal» JShS-niń basshylyǵy da apattyq jaǵdaıǵa baılanysty tutynýshylardan keshirim surady. Kompanııa eseptegish qural ornatylmaǵan páter ıelerinen apat kúni úshin tólem alynbaıtynyn, al eger maýsym aıy úshin tólem keshiktirilip jatsa ósimpul alynbaıtynyn eskertti.
