Pavlodar qalasynyń kóshelerindegi sý kolonkalary alynyp tastalmaqshy
PAVLODAR. KAZINFORM — Oblys ortalyǵyndaǵy jer úılerdi birtindep ortalyqtandyrylǵan aýyzsý qubyryna qosý josparlanǵan. Joba kelesi aptada bastalady dep kútilip otyr.
Pavlodar qalasynyń jer úıleri ornalasqan aýmaqtardaǵy sý kolonkalaryn alyp tastaýǵa sheshim qabyldandy. Olardyń sany búginde 100-den asady. Jaqyn kúnderi oblys ortalyǵyndaǵy shaǵyn aýdandardyń turǵyndaryn ortalyqtandyrylǵan aýyzsý qubyryna qosý josparlanǵan. Soǵan baılanysty kóshelerde samsap turǵan sý qurylǵylary joıylady.
Bul týraly Pavlodar oblysynyń energetıka jáne turǵyn úı-kommýnaldyq sharýashylyǵy basqarmasynyń basshysy Erjan Imanzaıypov habarlady.
— Qala boıynsha turǵyndardy ortalyqtandyrylǵan aýyzsýǵa qosýǵa arnalǵan 5 jobany júzege asyrý kózdelgen. Joba aıasynda kolonkalardy alamyz. Jer úılerge aýyzsý kirgen soń bul qurylǵylardyń qajeti bolmaı qalady, — dedi ol.
Atalǵan joba kelesi aptadan bastap júzege asa bastaıdy.
Buǵan deıin pavlodarlyqtardyń «Halyq qatysatyn bıýdjet» baǵdarlamasyna usynǵan jobalary eleýsiz qalǵany týraly jazǵanbyz.