Pavlodar qalasynda jol-kólik oqıǵasynan eki adam qaza tapty
ASTANA. KAZINFORM — Mitsubishi Carisma kóliginiń júrgizýshisi joldyń qarama-qarsy jolaǵyna shyǵyp, úsh jaıaý júrginshini qaǵyp ketken, dep habarlaıdy Kazinform tilshisi.
Polıtsııanyń málimetinshe, apat 29 maýsym kúni tústen keıin Nazarbaev dańǵylynda bolǵan.
Aldyn ala málimet boıynsha, júrgizýshi joldyń qarama-qarsy jolaǵyna shyǵyp, úsh jaıaý júrginshini qaǵyp ketti, sodan keıin baǵdarsham baǵanasy men avtobýs aıaldamasyna soǵylyp, kólik aýdarylyp qalǵan.
— Apat saldarynan eki jaıaý júrginshi qaza taýyp, taǵy bireýi aýrýhanaǵa jetkizildi. Mitsubishi Carisma kóliginiń qatysýymen bolǵan jol-kólik oqıǵasy faktisi boıynsha qylmystyq is qozǵaldy. Júrgizýshi ýaqytsha ustaý abaqtysyna qamaldy. Kólik arnaıy turaqqa qoıyldy, — dep habarlady Pavlodar oblysy polıtsııa departamenti.
Osyǵan deıin Almatyda Ál-Farabıdegi jol apaty boıynsha Aleksandr Pak 10 jylǵa sottalǵanyn jazdyq.
