Pavlodar qalasynda taǵy bir qazaq mektebi ashylady
PAVLODAR. KAZINFORM - Pavlodar qalasynyń «Dostyq» yqsham aýdanynda turǵyzylyp jatqan 1200 oryndyq jańa mektep tek qazaq tilinde bilim beretin bolyp sheshildi. Búginde oblys ortalyǵyndaǵy 43 mekteptiń 11-i - qazaq mektebi.
Bul týrly Pavlodar qalasynyń bilim berý bólimi habarlady.
- Biz jergilikti turǵyndardyń tilekterin eskere otyryp, «Dostyq» shaǵyn aýdanynda salynyp jatqan jańa «jaıly mektepte» oqytý qazaq tilinde júrgiziletinin habarlaımyz. Qazirgi tańda qarqyndy túrde damyp jatqan «Dostyq» shaǵyn aýdanynda mektep jasyndaǵy 747 bala turady. Olardyń 80%-dan astamy memlekettik tilde bilim alady, biraq kórshi №21 orta mektepte jáne Táshenev, Momyshuly mektepterinde, Bókeıhan atyndaǵy lıtseıde, sondaı-aq yqsham aýdannan tys jerlerde oqýǵa májbúr. Jańa «jaıly mektep» bul balalarǵa óz úılerine jaqyn jerde bilim alýǵa múmkindik berip, bolashaqta «Dostyqtyń» jas turǵyndary úshin qolaıly jaǵdaı jasaıdy (jeltoqsan aıynyń sońyna deıin munda qosymsha 96 páter paıdalanýǵa beriledi, al kelesi jyly 240 páterden turatyn taǵy úsh turǵyn úı salynady).
Sonymen qatar, kórshiles qazaq synyptary bar mektepterdiń júktemesin azaıtý josparlanyp otyr. Máselen, «Dachnyı» yqsham aýdanyndaǵy 1200 orynǵa arnalǵan №21 mektepte qazir 2134 oqýshy bilim alýda. «Dostyqtan» balalar kelip oqıtyn Kenjekól orta mektebinde 1020 orynnyń ornyna shamamen 1500 oqýshy bilim alýda, olardyń 917-si qazaq tilinde oqıdy,- málimdedi bilim berý bóliminen.
Sarapshylardyń boljamyna súıensek, óńir men oblys ortalyǵynda qazaq tilinde oqytýǵa suranys turaqty túrde arta bermek. Sońǵy 5 jylda 2 jańa mektep pen 3 qosymsha ǵımarat salynǵanymen, jańa bilim berý nysandary bul tapshylyqty tolyq joıa almaǵan. Olardyń ishinde tek bir mektepte (Bókeıhan atyndaǵy) bilim berý memlekettik tilde júrgiziledi. Qaladaǵy 43 mekteptiń tek 10-y ǵana qazaq tilinde oqytady. 2018 jyldan beri Pavlodardaǵy 15 orys tildi mektepte alǵash ret qazaq synyptary ashyldy, biraq bul máseleni sheshýge jetkiliksiz boldy.
«Dostyq» yqsham aýdanynda ashylǵaly otyrǵan 1200 oryndyq jaıly mektep tek turǵyndardyń suranysyn qanaǵattandyryp qana qoımaı, jas urpaqqa memlekettik tilde bilim alýdy qoljetimdi etýde mańyzdy qadam bolǵaly tur.
Atap óterligi, byltyrǵy jylynda oblys boıynsha mektep tabaldyryǵyn attaǵan 23,5 myń oqýshynyń 43 paıyzy qazaq synybyn tańdaǵan. Al bıyl 11 myńǵa jýyq balanyń 45 paıyzynyń tańdaýy qazaq mektepterine túsip otyr. Bul sál de bolsa alǵa jyljýdyń bar ekenin kórsetedi.
Aımaqtyń bilim salasyndaǵy statıstıkalyq derekterge sóz salyp kóreıik. 2024–2025 oqý jylynda Pavlodar oblysynda 360 jalpy bilim berý mektebi jumys istese, onyń ishinde 137-si - qazaq tilinde oqytatyn mektep (mektepterdiń sany, arasalmaǵy boıynsha 2022 jylǵy statıstıka ózgermegen). Olarda jalpy sany 118 myńǵa jýyq oqýshy oqysa, 50 myńnan astamy nemese 43 paıyzy ǵana qazaq tilinde bilim alady. Negizinen aımaqta aralas mektepterge qatysty másele barshylyq. Sebebi 100 paıyz qazaq tilinde bilim beretin mektepterde jańa oqý jylynda 33 myń oqýshy bilim alsa, aralas mektepterdegi qazaq synyptarynda oqıtyn oqýshylar sany – nebári 17,5 myń bala. Al aralas mektepterde oryssha bilim alatyndar sany – 60 myń oqýshy. ıAǵnı aralas mektepterdegi ár úsh synyptyń ekeýi – oryssha. Bul jerde taza oryssha oqytatyn mektepterdi sanatqa qosqan joqpyz. Sondyqtan qazaq mektepteriniń sanyn kóbeıtý óte quptarlyq qadam.
Eske sala keteıik, Pavlodar mektepterinde 6 myńnan astam oryn tapshylyǵy bar.