Pavlodar qalasyna 9 qyrkúıekte jylý berile bastaıdy

PAVLODAR. KAZINFORM — Jylý kózine alǵashqy bolyp balabaqsha, mektep, medıtsına mekemeleri sııaqty áleýmettik nysandar qosylady. Al 16 qyrkúıekten bastap jylý turǵyn úı sektorlaryna qoljetimdi bolady.

Bul týraly Pavlodar qalasynyń ákimi Hasar Habylbekov habarlady.

— Birden eskertetin jaıt, dál sol kúni turǵyndardyń páterlerindegi batareıalar birden qyzbaıdy. Jylý jelilerin tolyq toltyrý birshama ýaqytty alady. Jelidegi sý aınalymy 22 myń tonnany quraıdy. Al jylý elektr ortalyǵyndaǵy jelilik sýmen toltyrýdyń maksımaldy múmkindigi — táýligine 800 tonna kóleminde. Osyǵan baılanysty qalany jylýmen qamtýdy tolyq iske qosý jáne baptaý úshin bizge úsh-tórt aptaǵa deıin ýaqyt qajet, -dep eskertti shahar basshysy.

Pavlodar qalasynda jylytý maýsymy munshalyqty erte bastalyp kórgen joq.

Bul jeliler men úı kommýnıkatsııalaryn aldyn ala daıyndaýdyń nátıjesinde múmkin bolyp otyr. Bıylǵy aýa raıynyń qolaısyzdyǵy jylý maýsymyn erte bastaýǵa májbúr etip otyr. 

Jylý qosyla bastaǵannan-aq qalanyń jedel qyzmetteri kúsheıtilgen jumys rejımine aýysady. Bul jumystardy Hasar Habylbekov óz baqylaýymda ustaımyn dep ýáde etti.

Buǵan deıin qyrkúıek aıynyń salqyn bolyp turýyna baılanysty Pavlodarda jylý erte berilýi múmkin ekenin jazǵanbyz. 

Shaharda 270-ke jýyq kópqabatty úı qysqa daıyn emes. Olardyń 190-ynda basqarý formasy joq.