Pavlodar qalasy dızaın-kodynyń sozbaqqa salynyp kelýiniń syry nede
PAVLODAR. KAZINFORM - Pavlodardyń dızaın-kodyn ázirleý 2022 jyly josparlanǵanymen, ol tusta bılik memlekettik satyp alýdan bas tartty. Degenmen qujat qazirgi kúni bar.

Nazar Jumabekov sáýlet salasynda biraz jyldan beri eńbek etedi. Mamannyń pikirinshe, shaharda kórikti nysandar jetkilikti, sonyń ishinde tutastaı Qazaqstanǵa tanymal Máshhúr Júsip meshiti men Blagoveşenskıı sobory bar.
- Ózderine tıesili ǵımarattardy júdeý keıipte ustaıtyn turǵyndarǵa, kásipkerlerge aıtarymyz barshylyq. Másele álgi nysandardy ustap turýǵa qatysty, ol áýel basta eskızdik jobaǵa sáıkes ádemi kúıinde tapsyrylady, alaıda biraz ýaqyttan soń syrtyna jarnama tolyp ketedi. Qaptama plıtalary syna bastaıdy. Bul turǵyda habarlandyrý formalaryn oılap tapqan jón dep oılaımyn. Ózim qalanyń sáýlet bóliminde jumys istegen ýaqytta bizben birge mundaı sátterde polıtsııa da jumylatyn, - deıdi Nazar Jumabekov.

Qazaqstanda biryńǵaı sáýlettik kelbet uǵymyn engizýdiń tájirıbesi bar. Almatyda 2023 jyly dızaın-kod dep atalǵan qujat qabyldandy. Mamandardyń oıynsha, usaq-túıek máseleler túgeldeı qamtylǵan mundaı qujatty barlyq qalalarda qabyldaýǵa bolady.
- Dızaın kod kerek. Onda ár kósheniń dızaıny anyqtalýy tıis, mysal úshin tarıhı Astana kóshesi nemese Akademık Sátbaev kóshesi birkelki stılde bolǵany abzal. Al formattyń ózi qoljetimdi bolǵany jón, kásipkerler úshin qol jetpes qamaldaı bolyp kórinbeýi kerek. Olardy qaıdaǵy bir sheńber aıasyna tyǵyp qoıýǵa bolmaıdy, - dep qosty ol.
Negizi Pavlodar bıligi dızaın-kod týraly 2022 jyly oılaı bastaǵan edi. Memlekettik satyp alýlar portalynda qujatty ázirleýge qatysty lot paıda boldy. Biraq aqyr-sońy konkýrs ótkizilmedi.

Sáýlet jáne qala qurylysy bólimi qazirgi jaǵdaıǵa qatysty túsinik berdi.
- Qazirgi kúni qalanyń dızaın-kody bar, biraq ol qandaı da bir quqyqtyq qujatpen bekitilmegen. Biz ony basshylyqqa ala almaımyz, sebebi zań júzinde bekitilmegen soń belgili bir is-sharalar qabyldaýǵa quqyǵymyz joq. Qoldanystaǵy zańnama múmkindigimizdi shekteıdi. ıAǵnı dızaın-kodty qabyldaýǵa bizdiń quzyretimiz joq. Astana men Almaty aıryqsha qala mártebesine ıe bolǵandyqtan olar zańnama aıasynda áreket etip otyr, - dep túsindirdi Pavlodar qalasynyń sáýlet jáne qala qurylysy bóliminiń bas mamany Tımýr Seıitqalıev.

Joǵarydaǵy jaǵdaıdy eskersek, sheneýnikterdiń quzyretine jatpaıtyn keıbir jaıttardy qurylys salýshylarǵa tyıym retinde eskertýge bolmaıdy. Eger eshbir zań buzýshylyq baıqalmasa jobany bekitýge mindetti. Ári bolashaq ǵımarattardyń syrtqy kelbeti basym mindetter tiziminde qarastyrylmaǵan.
- Bizdiń qalada biryńǵaı sáýlettik kelbet degen uǵym bar, tutastaı alǵanda ony kásipkerler meılinshe eskerýi úshin tyrysamyz. Bylaısha aıtqanda, eger bir aýmaqta kópqabatty turǵyn úı aqshyl sary túske boıalsa, biz jaýapty adamdarǵa onyń syrt kózge alabajaq bolyp kórinbeýine kóńil aýdarýy kerek ekenin habarlaımyz, - dep qosty bólim ókili.


2024 jyly qaladaǵy ortalyq kóshelerdiń birin qaıta jańartýǵa sheshim qabyldanǵan. Lermontov kóshesiniń jańa kelbetin Almaty ýrbanısteri usyndy. Munda avtobýstar men velosıpedshiler úshin jeke jol jolaǵy qarastyryldy. Jaıaý júrginshiler joldaryna demalys aımaqtaryn, sýburqaqtardy qosty. Bul ázirshe Pavlodardaǵy kósheni biryńǵaı stılde jasaýdyń jalǵyz ǵana talpynysy ekenin aıtýymyz kerek. Alaıda syrtqy kelbetin tutastaı ózgertý múmkin emes. Kásiptik nysandardaǵy jarnamalyq túrli mańdaıshalar, bannerler, tústi palıtralar báribir ózgerissiz qalyp otyr.
- Sáýlet qaıdaǵy bir jeke ustanym, kózqarastardan bastaý ala almaıdy. Dızaın-kod bul – qujat. Bas tartylǵan sheshimderdiń barlyǵyn kásipkerler palatasy, prokýratýra jáne t.b. tekseredi. Dızaın-kodta barlyǵy jazylady: tóseletin kespe tastar, jol jabynynan bastap, qasbettiń túsi men óńi, qaptama materıaldary, mańdaıshalar, kógaldandyrý, shaǵyn pishinder de bar, - deıdi sáýletshi Nazar Jumabekov.

Eske sala keteıik, 2023 jyly Almatynyń ataýly qujaty bekitildi.
Keıin Almatynyń dızaın-kodyna sáıkes kelmeıtin mańdaıshalar men bannerler alyndy.
Al byltyr jazda Astana qalasynyń dızaın-kody ázirlenip jatqany týraly belgili boldy.
Sondaı-aq 2024 jyly Túrkistannyń jeke dızaın-kody engiziletini týraly jazǵanbyz.
Pavlodarlyq sáýletshiler mundaı qujat árbir aımaqta, kemi oblys ortalyǵynda bolýy kerek dep esepteıdi.