Pavlodar ǵalymdary Naýryz kóje negizinde jańa sút sýsynyn ázirleıdi
ASTANA. KAZINFORM — Naýryz kóje negizindegi ınnovatsııalyq sýsynnyń alǵashqy partııasy jyl sońyna deıin shyǵarylady, dep habarlaıdy Ǵylym jáne joǵary bilim mınıstrliginiń baspasóz qyzmeti.
Á. Marǵulan atyndaǵy Pavlodar pedagogıkalyq ýnıversıtetiniń ǵalymdary dástúrli qazaqtyń Naýryz kóje sýsyny negizinde ınnovatsııalyq fermenttelgen sút ónimin ázirleýge kirisedi.
Ǵalymdardyń jobasy «Ǵylym qory» AQ-nyń 2026-2028 jyldarǵa arnalǵan ǵylymı jáne ǵylymı-tehnıkalyq qyzmet nátıjelerin kommertsııalandyrýǵa granttyq qarjylandyrý konkýrsynyń jeńimpazy atandy.
«Emdik qasıeti bar fıtoıngredıenttermen sımbıotıkalyq mıkroflorany fermentteý negizinde jańa sút ónimderin ázirleý» jobasyna 365 mln teńge kóleminde grant bólindi.
Vedomstvo atap ótkendeı, jobanyń maqsaty — dástúrli Naýryz kóje negizinde jańa býynnyń fýnktsıonaldy sút ónimin jasaý. Qymyzdyq sańyraýqulaqtyń (kombýcha) sımbıotıkalyq mıkroflorasyn jáne arnaıy iriktelgen emdik qasıeti bar fıtoıngredıentterdi paıdalaný sýsynnyń taǵamdyq qundylyǵyn arttyryp, paıdaly qasıetterin kúsheıtýge ári sapasyn joǵaltpaı saqtaý merzimin uzartýǵa múmkindik beredi.
Jobanyń ǵylymı jetekshisi — tehnıka ǵylymdarynyń kandıdaty Esmurat Mateev. Tehnologııany ázirleýge Marǵulan ýnıversıtetiniń Bıotsenologııa jáne ekologııalyq zertteýler ǵylymı ortalyǵynyń dırektory Bıbigúl Jumabekova da qatysady. Ýnıversıtet ǵalymdary birneshe jyldan beri fermenttelgen sýsyndardy zertteýmen aınalysyp keledi. Baıqaýdaǵy jeńis ǵylymı ázirlemelerdi óndiristik deńgeıde engizýge jol ashady.
— Aldaǵy úsh jyl ishinde ǵalymdar ındýstrııalyq seriktespen birlesip ázirlengen tehnologııany óndiriske engizip, ınnovatsııalyq ónimdi naryqqa shyǵarýdy josparlap otyr. Sýsynnyń alǵashqy partııasyn 2026 jyldyń sońyna deıin óndirý kózdelgen. Innovatsııalyq ónim Jambyl oblysyndaǵy óndiristik alańda shyǵarylatyn bolady, — delingen mınıstrlik taratqan aqparatta.
Osyǵan deıin súr et qosylǵan naýryz kóje qalaı daıyndalatynyn jazdyq.
