Pavlodar dárigerleri oqýshynyń kózine tıgen oqty almaıtyn boldy
PAVLODAR. QazAqparat - Pavlodar oblysynda pnevmatıkalyq qarýdan jaraqat alǵan 15 jastaǵy jasóspirim kózine tıgen oqpen ómir súretin bolady. Bul týraly Óńirlik kommýnıkatsııalar qyzmetinde ótken baspasóz máslıhatynda málim boldy, dep habarlaıdy QazAqparat pavlodarnews.kz saıtyna silteme jasap.
«Aqqýly aýdanynan naýqastyń jetkizilgenine tórt táýlik ótti. Jedel túrde kómek kórsetildi. Ókinishke qaraı, oq jaraqaty saldarynan ol sol jaq kózinen aıyrylyp qaldy. Almaty kóz aýrýlary ǵylymı zertteý ınstıtýtymen baılanysqa shyqtyq. Ota oblystyq aýrýhananyń dárigerlerimen túnde jasaldy. Josparly emdeý júrgizilýde. Qazirgi tańda jaǵdaıy qanaǵattanarlyq dep baǵalanýda», - dedi oblystyq Densaýlyq saqtaý basqarmasynyń basshysy Oraz Muqashev.
Basqarma basshysynyń aıtýynsha, balanyń kózine engen oq alynbaıtyn bolyp sheshildi. Sebebi ol tereńde ornalasqan jáne qan ketý qaýpi tym joǵary.
«Jasóspirim kórý qabiletinen jaraqat alǵan kezde-aq aıyrylǵan. Sondyqtan, tek josparly túrde kózge enýkleatsııa (kóz almasyn alyp tastaý) jasalady», - dedi ol.
Oblystyq Polıtsııa departamentiniń aqparatyna sáıkes, 30 naýryz kúni Aqqýly aýdanynyń Sharbaqty aýylynda 18 jastaǵy jigit kóldiń jaǵasynan IJ-38 pnevmatıkalyq qarýyn taýyp alyp, úıdiń qaqpasyna atqan. Biraq oq metall esikke janaı tıip, janynda turǵan ózge balaǵa - 2004 jylǵy jasóspirimge tıgen. Ol kózine alǵan jaraqatpen oblystyq balalar aýrýhanasynyń oftalmologııa bólimshesine jetkizildi.
Dárigerler bógde zatty kózden alyp tastaý maqsatynda magnıttiń kómegimen jedel ota jasady.
Atalysh fakti Aqqýly aýdanynyń polıtsııa bólimshesinde tirkelgen. QR QK-niń 107-baby, 1-bóligi («Densaýlyqqa ortasha deńgeıde qasaqana zııan keltirý») boıynsha sotqa deıingi tergeý júrgizilýde.
