Pavlodar bıligi jańajyldyq bezendirýge 800 mln teńgege jýyq qarjy jumsamaq bolǵany ras pa

PAVLODAR. KAZINFORM — Áleýmettik jelide Pavlodar qalasynyń bıligi jańa jyldyq merekege oraı shahardy bezendirýge 791,9 mln teńgege bıýdjet qarajatyn shyǵyndaýdy josparlap otyrǵany týraly aqparat tarap ketti.

Aqparatta kórsetilgendeı, jańa jyldyń merekege oraı daıyndyq jáne qalany bezendirý boıynsha 3 lot Memlekettik satyp alýlar portalynda jarııalanǵan. 

Tapsyrys berýshi — Pavlodar qalasynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi. Onyń ishinde somalardyń eń irisi — 446,4 mln teńge. Odan keıin 236,6 mln jáne 108,9 mln teńge dep kórsetilgen. Qarajat merekelik konstrýktsııalardy montajdaý men qyzmet kórsetý, jabdyqtardy tasymaldaý, arnaıy tehnıka men qyzmetkerlerdiń jumysy úshin tólenetini kórsetilgen. Olardyń ishinde ondaǵan arnaıy tehnıka qajet etiletini aıtylady, ıaǵnı avtokrandar men samosvaldar, avtobýstar, tıegishter men avtomunaralar qajet.

Qala turǵyndary jelide munshama kóp somanyń jańajyldyq bezendirýlerge bólinýi oıǵa syımaıtynyn jazyp jatyr. Odan da bul aqshany balalarǵa tátti syılyqtar úlestirýge nemese oblystaǵy áleýmettik máselelerdi sheshýge baǵyttasa bolar edi degen pikirde.

Al Pavlodar qalasynyń bıligi lotta kórsetilgen qyzmetter jańa jyldyq bezendirýdi qarastyrmaıdy dep málimdedi.

— Bul shart jalpy qalalyq senbilikterdi ótkizý, sanıtarlyq tazalaý, konstrýktsııalardy, materıaldardy jáne basqa da qajetti júkterdi tasymaldaý kezinde mamandandyrylǵan tehnıkany paıdalanýdy kózdeıdi. Tehnıka tek Pavlodarda sharýashylyq jáne uıymdastyrý jumystaryn oryndaý úshin qoldanylady.
Budan basqa, ol tazalyq pen abattandyrý aılary kezeńinde tartylady, bilim berý jáne medıtsınalyq mekemelerge beriledi, sondaı-aq senbilikter ótkizý kezeńinde saıajaılardaǵy baý-baqsha aýmaqtarynan qoqystardy shyǵarý úshin paıdalanylady, — dep habarlady Kazinform tilshisine Pavlodar qalasy ákiminiń baspasóz qyzmetinen.

Byltyr Pavlodar qalasynda jańajyldyq is-sharalarǵa 190 mln teńge bólingen edi. 

Al bıyl merekege bólinetin qarajat 8 ese azaıyp, 23 mln teńgeni qurap otyrǵany týraly jazǵanbyz. 

2024 jyldyń qańtar aıynda Pavlodarda 52 mln teńgeniń shyrshasy qatty jelge shydamaı omaqasa qulaǵany áli de kóptiń esinde.