Pavlodar bıligi ýáde etken jańa tramvaılar qashan satyp alynady

PAVLODAR. KAZINFORM — Qazirgi ýaqytta oblys ortalyǵynda kúndelikti qatynaıtyn tramvaı kólikteriniń 73%-y tozyp tur.

Pavlodar qalasyndaǵy tramvaı joldarynyń jalpy uzyndyǵy — 90 km. Qalalyq tramvaı basqarmasynyń balansynda 111 tramvaı vagony bar bolsa, onyń 73%-y tozyp qalǵan.

Jergilikti bılik jyljymaly quramdy kezeń-kezeńimen jańartý jumystaryn júrgizemiz dep ýáde etkeli biraz ýaqyt ótti. Alaıda jańa kólik quraldaryn satyp alý jumystary keshigip jatyr. Oblys ákimdiginen bul jobanyń ne sebepti kesheýildep jatqanyn surap bildik.

— Eýropalyq qaıta jańartý jáne damý banki (EQDB) arqyly nesıe usyný esebinen akkýmýlıatorlyq batareıalarmen júretin ári energııa qýatyn barynsha únemdeıtin 25 jańa tramvaı satyp alý josparlanyp otyr. Jobanyń jalpy quny — 8 mlrd teńge. Bul qarajattyń 7 mlrd teńgesin atalǵan bank berse, taǵy 1 mlrd teńgesi oblystyq bıýdjetten qarastyrylǵan. Vagondardy satyp alýǵa arnalǵan konkýrs EQDB alańynda qaralý satysynda. Qazirgi ýaqytta 4 qatysýshydan usynystar qabyldandy. Konkýrs qorytyndysy jaqyn arada shyǵarylǵan soń jeńimpazben tramvaılardy jetkizý merzimderi aıqyndalatyn shart jasalady, — dep habarlady Pavlodar oblysy ákiminiń baspasóz qyzmetinen.

Aldaǵy jyldary tramvaı vagondary kezeń-kezeńimen jańartylyp, tıisti qarjylandyrýmen qamtamasyz etilgen jaǵdaıda «Dostyq» shaǵyn aýdanyna tramvaı jelisin uzartý kózdelgen. «Dostyqqa» tramvaı jelilerin salý jobasy memlekettik saraptamanyń oń qorytyndysyna ıe bolǵan. Qurylystyń jalpy quny 2,1 mlrd teńgeni qurap otyr. Barlyǵy jónimen bolsa, jobany iske asyrý keler jyly bastalady. Aldyn ala esep boıynsha shaǵyn aýdandaǵy boljamdy jolaýshylar aǵyny kúnine 5000 adamdy quraıdy.

Al «D. Mahmýdov atyndaǵy «Pavlodar qalasynyń tramvaı basqarmasy» AQ basqarma tóraǵasy Mýslım Mahmýdovtyń dereginshe, kásiporynda búginde shamamen 500 adam eńbek etedi. 2016 jyldan bastap munda jol aqyny elektrondyq tólem júıesi engizilgen. Ortasha eńbekaqy shamamen 350 myń teńgeni quraıdy, ony kóterý máselesi qarjylyq múmkindikter sheginde qarastyrylyp jatyr.

— Tramvaı parkinen kún saıyn 83 vagon jolǵa shyǵady. Sońǵy ret park 2017–2019 jyldary jańartylyp, Belarýste shyǵarylǵan 23 vagon satyp alyndy. Jalpy park jaǵdaıy qanaǵattanarlyq dep baǵalanady: vagondarǵa júıeli túrde aǵymdaǵy jáne kúrdeli jóndeý júrgiziledi, bul úshin depo qajetti jabdyqtarmen tolyq qamtamasyz etilgen. Kadr máselesine kelsek, shamamen 30 tramvaı júrgizýshisi, sondaı-aq elektr slesarlar men elektr jóndeýshiler sııaqty jumysshy mamandyqtar boıynsha tapshylyq bar, — deıdi ol.

Atap óterligi, tramvaı basqarmasy kóshe qıylystaryndaǵy tramvaı joldarynyń ótkelderine de nazar aýdaryp keledi. Bıyl jeti ótkeldi jańartý josparlansa, sonyń beseýi qazirgi kúni paıdalanýǵa berilgen.

Kásiporyn basshylyǵynyń aıtýynsha, qoldanystaǵy 100 teńgelik tarıf parktiń shyǵyndaryn jabýǵa jetkiliksiz. Ekonomıkalyq turǵydan alǵanda, naqty tarıf shamamen 300-320 teńgeni quraýy kerek. Biraq bul jolaýshylardyń qaltasyna salmaq salatyny anyq. Sondyqtan park kútimi men eńbekaqy tóleý jáne ózge de shyǵystar úshin bıýdjetten sýbsıdııa tólenedi.

Buǵan deıin 2025 jyly Pavlodarǵa jańa tramvaı vagondary jetkiziletinin jazǵanbyz.