Pavlodar aımaǵynda joǵary patogendi qus tumaýy taralýy múmkin – veterınar maman

PAVLODAR. KAZINFORM -Qazirgi ýaqytta jeke aýlalarda ólgen qustardyń jalpy sany – 1713 dana. Іndet 5 aýdanǵa tarap úlgergen.

Ertis-Baıan óńirinde taraǵan qus indeti joǵary patogendi qus tumaýy bolýy yqtımal.

- Ólip jatqan qustardaǵy aýrý belgilerine qarap joǵary patogendi qus tumaýy bolar dep shamalap otyrmyz. Biraq bul naqty dıagnoz emes. Veterınarııa boıynsha referendtik ortalyqtan mamandar kelip, qustardyń synamalaryn zertteýge alyp ketken. Onyń nátıjesi kelesi apta shyǵyp qalýy kerek. Nendeı indet ekeni sodan soń belgili bolady, - dep habarlady óńirlik veterınarııa basqarmasy basshysynyń orynbasary Ǵalym Beısenov.

Qazirgi ýaqytta ólgen úı qustarynyń sany 1713-ke jetken. Taralý aýmaǵy 5 aýdandy qamtyp, 7 eldi mekende úı qustarynyń qyrylýy tirkeldi. Qustardyń eń kóp ólýi Tereńkól aýdanynda (3 aýyldyń 15 aýlasynda) – 863 dana.

Mamandar joǵary patogendi qus tumaýy anyqtalsa, jeti aýylǵa karantın salynyp, barlyq úı qustary joıylatynyn jetkizdi. Qus ustaıtyn oryndarǵa dezınfektsııalyq is-sharalar júrgizilip, juqpaly aýrýdyń ózge jerlerge taralyp ketýiniń aldy alynady. Al karantınge jatqyzylǵan aýlalarǵa keıin memleketten ótemaqy tólenýi kerek. Sondyqtan jeke menshiginde qus bar azamattar qus ustaý sharttary týraly veterınarııa mamandarynyń usynystaryn qatań saqtaýǵa mindetti. Úı qustarynyń jabaıy qustarmen, ásirese sýda júzetin qustarmen baılanysta bolmaýyn qadaǵalaý shart.

Buǵan deıin Pavlodar óńirinde belgisiz indetten 1,5 myńǵa jýyq úı qusy qyrylyp qalǵany týraly jazǵanbyz.