Pavlodar avtojoldarynda 4 myńǵa jýyq aqaý anyqtalǵan

PAVLODAR. KAZINFORM - Joldardy qanaǵattanarlyqsyz jaǵdaıda ustaǵany úshin 277 laýazymdy jáne zańdy tulǵa ákimshilik jaýapkershilikke tartylǵan.

Óńir polıtseıleri oblystaǵy avtojoldardy tekserý barysynda 4 myńǵa jýyq aqaýdy anyqtady. Jol-tehnıkalyq ınspektsııa qyzmetkerleri belgilengen nusqaýlyqtar men normatıvterge sáıkes, kúndelikti baqylaý júrgizý arqyly avtojoldardyń jaı-kúıine memlekettik qadaǵalaýdy turaqty túrde júzege asyryp keledi.

– Tek bıyl jyl basynan jalpy uzyndyǵy 26 myń shaqyrym bolatyn avtojoldarǵa 1345 tekserý júrgizilip, nátıjesinde 3880 aqaý anyqtaldy. Joldardy qanaǵattanarlyqsyz jaǵdaıda ustaǵany úshin 277 laýazymdy jáne zańdy tulǵa ákimshilik jaýapkershilikke tartyldy, – dep habarlady Pavlodar oblysy polıtsııa departamenti ákimshilik polıtsııa basqarmasynyń bastyǵy Bákibaı Ahmedıanov.

Mysaly, «QazAvtoJol» UK» AQ-nyń, oblystyq jolaýshylar kóligi jáne avtomobıl joldary basqarmasynyń ókilderimen birlesip, avtojoldardyń jaǵdaıy jáne olardyń qysqy kezeńge daıyndyǵy tekserilgen. Tekserý barysynda jol jabynynyń búlinýi, jol belgileriniń tozýy, jaryqtandyrýdyń jetkiliksizdigi jáne qozǵalys qaýipsizdigine áser etetin basqa da máseleler anyqtalǵan. Tekserý qorytyndysy boıynsha jaýapty uıymdarǵa anyqtalǵan kemshilikterdi joıý úshin belgilengen merzimdermen nusqamalar berildi.

Eske sala keteıik, jyl basynan beri 2 myńǵa jýyq adam jol apatynan qaza tapqan.