Pavlodar aýrýhanasynda medıtsınalyq qaldyqtar qoımasy anyqtaldy: Tekseris bastaldy
PAVLODAR. QazAqparat – Pavlodar oblystyq Kardıologııa ortalyǵynda birrettik qoldanýǵa arnalǵan jáne paıdalanýǵa jaramsyz medıtsınalyq buıymdar anyqtaldy, dep habarlaıdy QazAqparat.
«Habar 24» arnasynyń málimetinshe, medıtsınalyq qaldyqtar qoımada jatqan. Olar qoldaný merzimi aıaqtalǵannan soń talaptarǵa sáıkes joıylýy tıis bolatyn. Biraq, bul shara qolǵa alynbaǵan. Emdeý mekemesinde saqtalyp jatqan zattar týraly jaýapty mekemege jergilikti turǵyndardyń biri habarlaǵan. Boljam boıynsha, ol – naýqastardyń biri. Shaǵymnan keıin tıisti tekserister qolǵa alyndy. Oblystyq Densaýlyq saqtaý basqarmasy ókilderiniń aıtýynsha, preparattardy saqtaýǵa jáne esepten shyǵarýǵa ortalyq mamandary jaýapty. Talaptardyń buzylýyna bas medbıke nemese bas dárigerdiń orynbasary jol berýi múmkin. Qazirgi tańda tergeý amaldary júrip jatyr. Sondyqtan ózge aqparat ázirge qupııa saqtalyp otyr.
«Jumys toby qurylyp, tekseris jumystary júrgizildi. Materıaldar quqyqqorǵaý organdaryna joldandy. Sonymen qatar prokýratýra jáne sybaılas jemqorlyq jónindegi ulttyq bıýro ókilderine berildi», - dedi oblystyq Densaýlyq saqtaý basqarmasy basshysynyń orynbasary Sáýle Arystanova.
