Pavlodar aýyldarynda qaıtarylǵan aktıvter esebinen ambýlatorııalar salynady

ASTANA. KAZINFORM — Pavlodar oblysy aýyldarynda medıtsınalyq nysandar salýǵa 228 mln teńge bólindi, dep habarlaıdy Úkimettiń baspasóz qyzmeti.

Memleket basshysynyń tapsyrmasyna sáıkes, Úkimet elimizge qaıtarylǵan zańsyz ıemdenilgen aktıvter esebinen áleýmettik jobalardy júzege asyryp keledi. Pavlodar oblysynda medıtsınalyq nysandar salýǵa Arnaýly memlekettik qordan 228 mln teńgeden astam qarjy bólindi.

Qarajat Ekibastuz, Aqsý qalalary aýyldyq okrýgindegi, sondaı-aq Ertis, Jelezın, Tereńkól aýdanyndaǵy jobalardy júzege asyrýǵa baǵyttalady.

— Ekibastuz aýyldyq okrýginiń Báıet aýylynda 1983 jyly paıdalanýǵa berilgen jalǵyz FAP ornyna feldsherlik-akýsherlik pýnkt salý josparlanýda. Eski ǵımarat jóndeýge jaramsyz dep tanyldy. Búginde eldi mekende 822 adam turady. Ertis aýdanynda dárigerlik ambýlatorııa ashylady. Nysan sanıtarlyq talaptar men normalarǵa saı jabdyqtalady. Aýdandaǵy medıtsınalyq pýnkt myńnan astam turǵanǵa qyzmet kórsetedi, — delingen habarlamada.

Qoldanystaǵy densaýlyq saqtaý nysandarynyń shalǵaı ornalasýyna baılanysty Myńkól, Ivanovka jáne Qurkól aýyldary da jańa medıtsınalyq nysandar salýdy qajet etetin eldi mekender tizimine engizilgen. Olarǵa eń jaqyn aýdandyq emhana 18 shaqyrymnan 115 shaqyrymǵa deıingi qashyqta ornalasqan. Aýyldarda turǵylyqty jeri boıynsha medıtsınalyq qyzmet kórsetetin jańa medıtsınalyq pýnktter salynady.

Aıta keteıik, Pavlodar oblysynyń eldi mekenderinde 168 myńnan astam turǵyn bar.Jańa densaýlyq saqtaý nysandaryn salý jumys istep turǵan uıymdarǵa túsetin júktemeni azaıtyp, halyqqa kórsetiletin medıtsınalyq kómektiń sapasyn arttyrýǵa múmkindik beredi.