Pavlodar áýejaıyna akademık Qanysh Sátbaevtyń esimi berilýi múmkin
«Qanysh Imantaıuly Sátbaevtyń mereıtoıyn atap ótý bastamasyn qoldaımyz. Bul rette 2023-2025 jyldarǵa arnalǵan mereıtoılar men ataýly kúnderdiń tizbesine sáıkes, Qanysh Sátbaevtyń 125 jyldyq mereıtoıyn daıyndaý jáne ótkizý sharalary 2024 jylǵa josparlanyp otyr. Mereıtoıdy uıymdastyrýǵa jáne ótkizýge jaýapty oryndaýshy - Ǵylym jáne joǵary bilim mınıstrligi», - deıdi Úkimet basshysy jaýabynda.
Onyń atap ótýinshe, mınıstrlik jalpy respýblıkalyq is-sharalar josparyn ázirleý jáne bekitý máselesin pysyqtaýda.
«Sizder usynyp otyrǵan is-sharalar zańnamada belgilengen tártippen respýblıkalyq jáne jergilikti bıýdjetterdiń múmkindikterin eskere otyryp, atalǵan jospardy ázirleý kezinde qaralady», - dedi Álıhan Smaıylov.
Aıta keteıik, senatorlar depýtattyq saýalynda qazaq halqynyń birtýar perzentine laıyqty qurmet kórsetý jáne qısapsyz ushan-teńiz eńbegin keńinen nasıhattaý maqsatynda Astana qalasynda «Sátbaevtaný» ortalyǵyn ashý, týǵan eli Pavlodar qalasynyń áýejaıyna akademık Qanysh Sátbaev esimin berý, alǵashqy akademıktiń 10 tomdyq tolyq jınaǵy men 5 tomdyq akademııalyq shyǵarmalar jınaǵyn daıyndaý jáne entsıklopedııasyn tolyqtyryp, jańadan eki tilde shyǵarý, rýhanııat janashyry bolǵan ǵulama týraly tolyqmetrajdy kórkem-derekti fılm túsirý jáne qaıratkerge arnalǵan Qazaqstandaǵy mýzeılerdi zamanaýı qalypqa keltirý, kindik qany tamǵan jerde memorıaldyq keshen turǵyzý jáne buǵan deıingi depýtattyq saýalda kóterilgen 30 kılometrlik týrıstik joldy salýdy bastaý; qazaq eliniń taýtulǵalary arqyly memleketimizdi shetelde kórsetý turǵysynan «Meniń halqym menen de bıik» degen Ulybrıtanııada ataqty Ý.Cherchıllge aıtqan sózderiniń kezdesý sátin beıneleý maqsatynda astanasynda eskertkish qoıýdy qarastyrý usynylǵan edi.
