Pavlodar áýejaıynyń ótkizý qabileti 300 jolaýshyǵa deıin artady
ASTANA. KAZINFORM — Qaıtarylǵan aktıvter Pavlodar áýejaıyn jańartýǵa jumsalyp jatyr.
Pavlodar áýejaıy memleketke qaıtarylǵan aktıvter esebinen jańartylyp jatyr. Bas Prokýrordyń tapsyrmasymen Bas kólik prokýrory Pavlodar áýejaıynyń ushý-qoný jolaǵyn rekonstrýktsııalaý barysymen tanysty. Jobany iske asyrýǵa prokýratýra organdary zańsyz ıemdenilgen aktıvterdi qaıtarý arqyly qalyptastyrǵan Arnaıy memlekettik qor qarajatynan 9 mlrd teńgeden astam qarajat baǵyttaldy.
Qurylys-montajdaý jumystary kestege saı júrgizilýde, rekonstrýktsııany 2026 jyldyń qyrkúıek aıynda aıaqtaý josparlanǵan. Merdiger uıymǵa, tapsyrys berýshige jáne tehnıkalyq qadaǵalaý qyzmetine jumystardyń ýaqtyly ári sapaly oryndalýyn, eńbekti qorǵaý men ekologııalyq zańnama talaptarynyń qatań saqtalýyn, sondaı-aq bólingen memlekettik qarajattyń zańdy jáne tıimdi paıdalanylýyn qamtamasyz etý qajettigi kórsetildi.
— Rekonstrýktsııadan keıin áýejaıdyń ótkizý qabileti saǵatyna 200-den 300 jolaýshyǵa deıin artyp, qyzmet kórsetý sapasy men jolaýshylarǵa arnalǵan jaılylyq deńgeıi artady. Infraqurylymnyń jańarýy Pavlodar oblysynyń kóliktik qoljetimdiligin arttyryp, óńirdiń elimizdiń basqa qalalarymen baılanysyn jaqsartady. Joba prokýratýra organdarynyń erekshe baqylaýynda, — delingen Bas kólik prokýratýrasy taratqan aqparatta.
Buǵan deıin Pavlodar áýejaıyndaǵy qurylys jumystary shilde aıynyń ortasynda aıaqtalatyny aıtyldy.
