Pavlodar áýejaıyn jańartýǵa oblys bıýdjetinen qosymsha 673 mln teńge bólindi

PAVLODAR. KAZINFORM — Pavlodar áýejaıy 2006 jyldan beri jóndeý kórmegen. Ony halyqaralyq talaptarǵa saı etý úshin jańartý jumystary qajet.

Mamandar esepteı kele, áýejaıdy tolyqtaı jańartý jobasyna 16 mlrd 400 mln teńge qajet degen sheshimge kelgen. Ótken jyly 4,8 mlrd teńge bólinip, qajetti qural-jabdyqtar satyp alynǵan.

— Jóndeý jumystary 1 sáýirden bastalǵan. 1 qarashaǵa deıin Pavlodar qalasy áýejaıynyń ushý-qoný jolaǵyn keńeıtý jáne qaıta jańartý jumystary júrgiziledi. Rekonstrýktsııalaý jumystary jolaýshylar áýe tasymaly qaýipsizdiginiń deńgeıin arttyrýǵa, ushýǵa jaramdylyq sertıfıkatyn alýǵa, sondaı-aq, áýe aılaǵynyń múmkindikterin keńeıtýge baǵyttalǵan. Jumystar aıaqtalǵannan keıin áýejaı úlken áýe kemelerin qabyldaı alady jáne júk tasymaly kólemin arttyra alady, — dep habarlady Pavlodar oblysy ákiminiń baspasóz qyzmetinen.

Jaqynda oblystyq máslıhattyń kezekti sessııasynda óńir qazynasynan rekonstrýktsııa jumystaryna qosymsha taǵy 673 mln teńge bólinetini málim boldy. Buǵan deıin jańartý jumystaryna 1 mlrd 584 mln teńge bólinip, onyń 967 mln teńgesi oblys bıýdjetinen alynǵan edi. Osylaısha jergilikti bıýdjet qazirdiń ózinde jobany 1,6 mlr teńgege qarjylandyryp otyr.

Eske sala keteıik, Pavlodar áýejaıy bıyl 1 sáýirden jóndeýge jabylǵany týraly habarlaǵanbyz.