Pavlodar áýejaıyn jańartýǵa qarajat jetpeı jatyr

PAVLODAR. KAZINFORM — Pavlodar áýejaıyndaǵy jóndeý jumystary bıyl aıaqtalmaýy múmkin. Sebebi, ushyp-qoný jolaǵy tolyq daıyn bolý úshin taǵy 9,3 mlrd teńge kerek.

Pavlodar áýejaıy 2006 jyldan beri jóndeý kórmegen. Ony halyqaralyq talaptarǵa saı etý úshin jańartý jumystary qajet. Byltyrdan beri Pavlodarǵa ushaq qatynamaıdy.

Al áýejaıdaǵy ushyp-qoný jolaǵyn keńeıtip, jańartýǵa 16 mlrd teńgeden astam qarjy bólý josparlanǵan bolatyn. Byltyr 4,8 mlrd bólinip, oǵan qajetti qural-jabdyqtar satyp alyndy. Bıyl nebári 2,3 mlrd teńge berildi. Ázirge jumys kestege saı júrip jatyr. Biraq qarjy bólinbese toqtaýy ábden múmkin.

— Qazirgi tańda bizge jobany aıaqtaý úshin 9,3 mlrd teńge qajet. Arnaıy bıýdjettik ótinim Kólik mınıstrligine jiberildi. Bıylǵa 2,3 mlrd teńge bólindi. Atalǵan qarajatqa jáne merdiger óz qarajatyn qosyp jumystardy jalǵastyryp jatyr, — deıdi óńirlik jolaýshylar kóligi jáne avtomobıl joldary basqarmasy basshysynyń orynbasary Narıman Omar.

Buǵan deıin Pavlodar áýejaıyn jańartýǵa oblys bıýdjetinen qosymsha 673 mln teńge bólingenin týraly jazǵanbyz.