Pavlodar áýejaıyn jańartý jumystary tamyz aıyna deıin uzartyldy
PAVLODAR. KAZINFORM — Qazirgi ýaqytta jumystardyń jalpy oryndalý deńgeıi — 75%. Jobany aıaqtaý 10 tamyzǵa belgilenip otyr.
Oblys ortalyǵyndaǵy ushý-qoný jolaǵyn rekonstrýktsııalaý jumystary tamyz aıynyń alǵashqy onkúndiginde aıaqtalady. Nysan sertıfıkattaýdan ótip, paıdalanýǵa berilgennen keıin oblys ortalyǵynan ushýlar qaıta jandanady dep kútilýde.
— Búgingi tańda jumystardyń 75%-y aıaqtaldy. Ushý-qoný jolaǵy keńeıtilip, asfalt-beton tóselip, jaryq sıgnaldyq jabdyqtar ornatylyp jatyr. Qurylys-montajdaý jáne iske qosý-retteý jumystaryn 10 tamyzǵa deıin aıaqtaý, odan ári sertıfıkattaý júrgizý, nysandy paıdalanýǵa berý jáne áýe reısterin qaıta bastaý josparlanǵan, — deıdi Pavlodar oblysy jolaýshylar kóligi jáne avtokólik joldary basqarmasy basshysynyń orynbasary Farhat Ospanov.
Buǵan deıin Pavlodar oblysy ákimdigi áýejaıdaǵy jańartý jumystary shilde aıynda aıaqtalyp, tamyzda iske qosylady dep ýáde etken edi.
Alaıda is júzinde áýejaıdy iske qosý áli de biraz ýaqytqa sozylatynǵa uqsaıdy.
Áýejaıdy rekonstrýktsııalaýǵa memleketke qaıtarylǵan aktıvterden 9 mlrd teńgeden astam qarajat bólindi. Jańartý jumystary nátıjesinde áýejaıdyń ótkizý qabileti 300 jolaýshyǵa deıin artady dep kútilip otyr.
