Pavlodar áýejaıy ushý-qoný jolaǵy jańǵyrtylǵannan keıin ushaqtardy qabyldaı bastady
PAVLODAR. KAZINFORM — Pavlodar áýejaıy Astanadan alǵashqy áýe reısin qabyldady. Qazirdiń ózinde Astana jáne Almaty qalalarymen turaqty áýe qatynasy tolyqtaı qalpyna keltirildi.
Memleket basshysy Qasym-Jomart Toqaevtyń kólik ınfraqurylymyn damytý jáne óńirlerdiń ózara baılanysyn arttyrý jónindegi tapsyrmasy aıasynda Pavlodar qalasyndaǵy áýejaıdyń ushý-qoný jolaǵyn aýqymdy qaıta jańǵyrtý jumystary aıaqtaldy. Ushý-qoný jolaǵy qajetti sertıfıkattaýdan ótip, turaqty áýe qatynasy tolyqtaı qalpyna keltirildi.
Áýejaıdyń tolyqqandy jumysyn qaıta bastaý úshin barlyq ruqsat qujattary alynǵan. Áýeli 17 tamyzda avıatsııalyq qaýipsizdik qyzmeti sertıfıkattalsa, 21 tamyzda áýejaıǵa jaramdylyq sertıfıkaty berildi.
Qaıta jańǵyrtý jumystary ICAO halyqaralyq standarttarynyń talaptaryna sáıkes júrgizildi. Áýejaı 2025 jyldyń 1 sáýirinen bastap jabylyp, ushý-qoný jolaǵynyń eni 45 metrden 60 metrge deıin ulǵaıtyldy. Sonymen qatar jaryq-sıgnal berý jabdyqtary, jaryqtandyrý jáne beınebaqylaý júıeleri jańartylyp, áýejaı aýmaǵynyń perımetri boıynsha jańa qorshaý ornatyldy. Jobaǵa jalpy 16,4 mlrd teńge baǵyttalsa, onyń ishinde 9,3 mlrd teńge arnaıy memlekettik qor qarajaty esebinen bólingen.
Budan bylaı Vietjet Qazaqstan áýe kompanııasy Pavlodar — Astana baǵyty boıynsha aptasyna tórt ret, al FlyArystan áýe kompanııasy Pavlodar — Almaty baǵyty boıynsha kún saıyn reıster oryndaıdy.
Oblys ákimi Asaıyn Baıhanov qaıta ashylǵan nysannyń jumys barysymen jáne ony odan ári damytý josparlarymen tanysty.
— Biz bul sátti asyǵa kúttik. Eń bastysy — turaqty reısterdi qaıta qalpyna keltirdik. Búginde áýe kemeleri Pavlodardy Astana jáne Almaty qalalarymen baılanystyryp otyr. Endi oblys turǵyndarynyń iskerlik saparlary men saıahattaryna barynsha múmkindik jasaý úshin áýe baǵyttaryn kezeń-kezeńimen ulǵaıtatyn bolamyz, — dedi óńir basshysy.
Qazirgi ýaqytta áýe baǵyttaryn keńeıtý jumystary jalǵasyp, SCAT áýe kompanııasy Aqtaý, Shymkent jáne Aqtóbe baǵyttaryna reıster ashý múmkindigin qarastyryp jatyr. Halyqaralyq baǵyttar boıynsha Centrum Air áýe kompanııasymen Pavlodar — Tashkent baǵyty boıynsha 2027 jylǵy naýryzdan bastap reıster ashý týraly aldyn ala kelisimge qol jetkizildi. Sondaı-aq Máskeý, Novosibir, Úrimshi, Antalıa jáne Sharm-el-Sheıh baǵyttary zerdelenip jatyr.
Kelesi kezeńde áýejaı ǵımaratyn qaıta jańǵyrtý josparlanyp otyr. Joba ushý zalyn keńeıtýdi, onyń ótkizý qabiletin saǵatyna 200-den 300 jolaýshyǵa deıin arttyrýdy, ishki jáne halyqaralyq reısterdiń jolaýshylar aǵynyn bólýdi, júkterdi óńdeý men tekserýdiń avtomattandyrylǵan júıesin ornatýdy, teleskopııalyq traptary bar eki galereıa salýdy kózdeıdi. Termınaldy qaıta jańǵyrtý kezinde de turaqty reısterdi oryndaý toqtatylmaıdy.
Oblys ákiminiń aıtýynsha, basty maqsat — áýejaıdy óńirdiń zamanaýı, qolaıly ári baǵyttar tańdaýy bar tolyqqandy áýe qaqpasyna aınaldyrý jáne onyń tranzıttik áleýetin arttyrý.
Eske sala keteıik, Pavlodar áýejaıy 2025 jyly 1 sáýirden jóndeýge jabylǵan edi.
Byltyr kúzde ashylady degen nysandaǵy jóndeý jumystary qarjy jetkiliksizdigine baılanysty bir jylǵa uzardy.
Keıin Pavlodar áýejaıy qaıtarylǵan aktıvter esebinen qaıta jańǵyrtylatyny belgili boldy.
Jóndeýden soń Pavlodar áýejaıynyń ótkizý qabileti 300 jolaýshyǵa deıin artatynyn habarlaǵanbyz.
