Pavlodar áýejaıy 1 sáýirden jóndeýge jabylady

PAVLODAR. KAZINFORM — Ertis-Baıan óńiriniń basty áýejaıyn tolyqtaı jańartý jobasy 16,4 mlrd teńgege baǵalanyp otyr.

Pavlodar áýejaıy 1 sáýirden jóndeýge jabylatyn boldy. Áýe qatynasy shamamen 7 aıdaı toqtatylady. 

— 1 sáýirden 1 qarashaǵa deıin Pavlodar qalasy áýejaıynyń ushý-qoný jolaǵyn keńeıtý jáne qaıta jańartý jumystary júrgiziledi. Osyǵan baılanysty barlyq áýe baǵyttary toqtatylady, — dep habarlady oblys ákiminiń baspasóz qyzmetinen.

Resmı aqparatqa súıensek, Pavlodar áýejaıy 2006 jyldan beri jóndeý kórmegen. Ony halyqaralyq talaptarǵa saı etý úshin jańartý jumystary qajet. Mamandar esepteı kele, áýejaıdy tolyqtaı jańartý jobasyna 16 mlrd 400 mln teńge qajet degen sheshimge keldi. Ótken jyly 4,8 mlrd teńge bólinip, qajetti qural-jabdyqtar satyp alynǵan. Sáýirden bastalatyn jańartý jumystaryna 1 mlrd 584 mln teńge daıyn tur. Qarjynyń 967 mln teńgesi oblystyq bıýdjetten, qalǵany respýblıkalyq qazynadan bólinedi. Qaıta jańartýdy tolyqtaı aıaqtaý úshin taǵy 9 mlrd teńgeden astam qarjy qajet. Jóndeý aıaqtalǵanda ishki reıster sany artyp, jańa halyqaralyq baǵyttardy ashý kózdelgen.

Byltyr Pavlodar áýejaıy uzaq ýaqytqa jabylady delingen edi. Biraq qarajat jetkilikti bolmaǵandyqtan jóndeý jumystary shegerildi.