Pavlodar aýdanynda 40 jastaǵy er adam sýǵa batyp ketti
ASTANA. QazAqparat - Pavlodar aýdany Gosplemstantsııa aýylynda er adam Ertis ózenine batyp ketti, dep habarlaıdy pavlodarnews.kz.
Bul týraly oblystyq TJD baspasóz qyzmetinde habarlady.
«40 jastaǵy aýyl turǵyny mas kúıinde tyıym salynǵan jerde shomylǵan. Saǵat 14:00-de kýágerler onyń denesin sýdan taýyp shyǵardy. Qutqarýshylardyń aıtýynsha, jyl basynan beri 10 adam sýdan ajal qushty, onyń úsheýi - bala. Sýǵa ketken eresekterdiń kóbi mas kúıinde sýǵa túsken. 79 adam qutqaryldy, onyń - 30-y bala», - delingen habarlamada.
- Oqys jaǵdaılardyń aldyn alý úshin tártip saqshylarymen birge reıd sharalary júrgizilip, ańdatpalar taratylady. Biraq, adamdar ony eskermeıdi. Sondyqtan budan bylaı qaýipsizdik erejelerin buzǵan azamattar, jaǵajaıda ishimdik ishkender men balalaryn qaraýsyz qaldyrǵandar ákimshilik jaýapqa tartylady. QR Ákimshilik quqyqbuzýshylyq kodeksiniń 412-babyna saı 7-den 60-qa deıingi AEK kóleminde aıyppul taǵylady, - deıdi departament mamandary.
