Pavlodar aýdanyna jańa ákim taǵaıyndaldy
ASTANA. KAZINFORM — Búgin óńir basshysy Asaıyn Baıhanov Pavlodar aýdanynyń aktıvine jańa ákim Dıdar Ibraevty tanystyrdy. Bul týraly vedomstvonyń baspasóz qyzmeti málim etti.
Pavlodar aýdanyn 2023 jyldyń qańtarynan bastap basqarǵan Nıkolaı Dychko óz erkimen qyzmetinen bosatyldy.
Oblys ákimi osy ýaqyt ishinde qol jetkizilgen nátıjelerdi atap ótti: Qarakól jáne Bogdanovka aýyldarynda ortalyq sý qubyry salyndy, Chernoretsk aýylyndaǵy sý qubyry qaıta jańartyldy, 11 shaqyrymnan astam kirme joldarǵa asfalt tóseldi, halyqtyń áleýmettik osal toptary úshin 23 úı satyp alyndy. Áleýmettik salaǵa úlken kóńil bólindi.
— Ózderińiz biletindeı, Sychevka aýylynda apatty jaǵdaıda bolǵan mekteptiń ornyna jańa mektep salyndy, 2 mektep, 3 mádenıet úıine kúrdeli jóndeý júrgizildi, aýdan tarıhy murajaıy ashyldy, balalar alańdary men shaǵyn fýtbol alańdary ornatyldy, — dedi óńir basshysy.
QR Prezıdenti Ákimshiliginiń jáne aýdandyq máslıhat depýtattarynyń kelisimimen, óńir basshysynyń ókimimen Pavlodar aýdanynyń ákimi bolyp Dıdar Ibraev taǵaıyndaldy.
Dıdar Elýbekuly 1992 jyly Jelezın aýdanynda dúnıege kelgen.
2014 jyly S. Toraıǵyrov atyndaǵy Pavlodar memlekettik ýnıversıtetin «Quqyqtaný» mamandyǵy boıynsha aıaqtaǵan.
Eńbek jolyn 2009 jyly QR Bas prokýratýrasynyń quqyqtyq statıstıka jáne arnaıy esepke alý komıtetiniń aýmaqtyq organynda bastaǵan.
2015 jyldan bastap QR memlekettik qyzmet isteri jáne sybaılas jemqorlyqqa qarsy is-qımyl agenttiginiń Pavlodar oblysy boıynsha departamentiniń atqarýshy jáne basshylyq laýazymdarynda qyzmet atqardy.
2018 jyldan bastap jergilikti atqarýshy bılik organdarynda eńbek etedi.
2022 jyldan bastap osy ýaqytqa deıin Pavlodar oblysy ákimi apparatynyń basshysy qyzmetin atqardy.
Dıdar Elýbekuly prezıdenttik jastar kadr rezerviniń múshesi bolyp tabylady. 2020 jyly «Úzdik memlekettik qyzmetshi» ataǵyn aldy.
Asaıyn Baıhanov oblystyń eń iri aýdandarynyń birine taǵaıyndalǵan jańa basshynyń aldyna birinshi kezektegi mindetterdi qoıdy.
— Aýdan ınvestıtsııa tartý áleýetine ıe. Alaıda, ókinishke qaraı, AÓK, áleýmettik jáne týrıstik salalarǵa, aýdan úshin strategııalyq óńdeýshi ónerkásipke ınvestıtsııa tartý jumystary óte tómen deńgeıde, — dedi oblys ákimi.
Óńir basshysy ınvestıtsııa tartý jáne jańa jumys oryndaryn ashý jumystaryn jandandyrýdy tapsyrdy.
Sondaı-aq, Pavlodar aýdanynyń ákimdigi bıyl 10 aıynyń qorytyndysy boıynsha tıimdilik reıtınginde aýtsaıder bolyp otyr.
— Bıylǵy jyly aýdannyń keıbir memlekettik qyzmetshileri tikeleı fýnktsıonaldyq mindetterin oryndaýdyń ornyna sotty jaǵalap ketti. Bul memlekettik qyzmetshilerdiń halyq aldyndaǵy senimi men bedeline nuqsan keltiredi. Búgingi tańda aýdanda 9 bos jumys orny bar. Bıznes-protsesterdi durys qurý, qolda bar bos jumys oryndaryna konkýrstar jarııalaý qajet. Kadr saıasaty naqty tujyrymdalyp, barlyq qyzmetkerler úshin ashyq bolýy kerek, — dedi oblys ákimi.
Sondaı-aq, másele týyndaǵan nysandarmen aınalysyp, paıdalanýǵa berý qajet: Kemenger aýylyndaǵy dene-shynyqtyrý saýyqtyrý kesheni, shaǵyn ortalyqqa arnalǵan Zańǵar mektebine qosymsha ǵımarattyń qurylysy.
Buǵan deıin Abaı oblysynyń Qorǵanys isteri jónindegi departamentine jańa basshy taǵaıyndalǵany habarlandy.