Pavlodar-Astana jolyndaǵy kólik apaty: jansaqtaý bólimindegi balany sanavıatsııamen jetkizedi

PAVLODAR. KAZINFORM - Aqmola oblysy Ereımentaý aýdandyq aýrýhanasynyń jansaqtaý bóliminde jatqan balany Pavlodarǵa áýe kemesimen tasymaldaý kózdelip otyr.

Astanaǵa aparar joldaǵy kólik apatynan zardap shekken balalardyń barlyǵyn aýrýhanadan ata-analary alyp ketken. Tek jansaqtaý bólimshesindegi jasóspirim ǵana qalyp otyr.

— Ereımentaý aýdandyq aýrýhanasyna jatqyzylyp, dárigerlerdiń qaraýyna alynǵan balalardyń barlyǵy ata-analarymen úılerine jiberildi. Úsh jasóspirimdi ata-ananyń biri senimhat boıynsha alyp ketti. Aýrýhananyń jansaqtaý bólimshesinde zardap shekken bala ǵana qaldy. Pavlodar oblysynyń sanıtarlyq avıatsııasy balany jaqyn arada alyp ketedi dep kútilip otyr, — dep habarlady Aqmola oblystyq densaýlyq saqtaý basqarmasynan.

Eske sala keteıik, Pavlodar-Astana jolynda balalar mingen avtobýs aýdarylyp, jattyqtyrýshy kóz jumdy.  Qaza tapqan er azamat 1990 jyly týǵan. Avtobýsty patrýldik kólik súıemeldemegeni belgili boldy.

Keıinirek jol apatynan jeti bala zardap shegip, Ereımentaý aýdandyq aýrýhanasyna jetkizilgenin, olardyń bireýi jansaqtaý bólimshesinde jatqanyn jazǵan bolatynbyz.