Pavlodar-Astana jolyndaǵy kólik apaty: Fýtbol federatsııasy bapkerdiń otbasyna kóńil aıtty

ASTANA. KAZINFORM – Qazaqstan fýtbol federatsııasynyń prezıdenti Marat Omarov balalar fýtbolynyń bapkeri Álibek Júsipovtiń jol apatyna túsip, mezgilsiz qaıtys bolýyna baılanysty kóńil aıtty. 

— Qazaqstan fýtbol federatsııasynyń prezıdenti Marat Omarov balalar fýtbolynyń bapkeri Álibek Júsipovtiń jol apatyna túsip, mezgilsiz qaıtys bolýyna baılanysty qaıǵyryp, marqumnyń otbasy men týystaryna kóńil aıtý jedelhatyn joldady, — delingen habarlamada.

Qazaqstan fýtbol federatsııasy tarapynan kómek kórsetiletinin málimdedi.

— Qazaqstan fýtbol federatsııasy tarapynan jan-jaqty kómek kórsetiledi. Álibek Júsipov balalar men jasóspirimder fýtbolyn damytýǵa zor úles qosty. Ol bapkerlik qyzmetinde talaı jas fýtbolshynyń jolyn ashyp, otandyq fýtbolǵa adal eńbek etti. Jaqsy adam, bilikti maman retinde esimizde máńgi saqtalady. Marqumnyń jany jánnatta, jatqan jeri jaıly bolsyn, — delingen habarlamada.

Eske sala keteıik, Pavlodar-Astana jolynda balalar mingen avtobýs aýdarylyp, jattyqtyrýshy kóz jumdy. Qaza tapqan er azamat 1990 jyly týǵan. Avtobýsty patrýldik kólik súıemeldemegeni belgili boldy.

Keıinirek jol apatynan jeti bala zardap shegip, Ereımentaý aýdandyq aýrýhanasyna jetkizilgenin, olardyń bireýi jansaqtaý bólimshesinde jatqanyn jazǵan bolatynbyz. Aqmola oblysy Ereımentaý aýdandyq aýrýhanasynyń jansaqtaý bóliminde jatqan balany Pavlodarǵa sanavıatsııamen tasymaldaý kózdelip otyr.