Pavlodar-Astana jolyndaǵy kólik apaty: Balalardyń quqyqtaryn qorǵaý komıteti málimdeme jasady

ASTANA. KAZINFORM – Oqý-aǵartý mınıstrliginiń Balalardyń quqyqtaryn qorǵaý komıteti Pavlodar – Astana tas jolynda balalar zardap shekken jol-kólik oqıǵasyna qatysty pikir bildirdi. 

Komıtettiń málimetinshe, apat kezinde 2011–2012 jyldary týǵan balalar komandalary arasyndaǵy fýtbol týrnırine qatysý úshin Astana qalasyna bara jatqan jeke fýtbol mektebiniń tárbıelenýshileri bolǵan.

— Balalardyń ata-analary jarysqa qatysýǵa jáne kólikpen júrýge kelisimin WhatsApp messendjerindegi ortaq chatta jazbasha túrde bergen. Alaıda, jeke fýtbol mektebiniń ókilderi balalardy tasymaldaý týraly jergilikti jáne quqyq qorǵaý organdaryna habarlamaǵan, — dep atap ótti vedomstvo.

Sonymen qatar komıtet buǵan deıin barlyq jergilikti atqarýshy organǵa balalardy tasymaldaýdy uıymdastyrý jóninde naqty talaptary bar nusqaýlyqtar joldaǵanyn, onda ilespe adamdardyń jaýapkershiligi, kóliktiń tehnıkalyq jaǵdaıy jáne qajetti qujattardyń bolýy mindetti túrde kórsetilgenin eske saldy.

— Qazirgi ýaqytta 16 balanyń 15-i úılerine jetkizildi. Bir bala búgin sanıtarlyq avıatsııa arqyly Pavlodar qalasyndaǵy oblystyq balalar aýrýhanasyna jetkizilip, emin turǵylyqty jerinde jalǵastyrady. Pavlodar oblysyndaǵy balalar quqyqtary jónindegi óńirlik ýákil zardap shekken balanyń anasymen baılanysta, — dedi komıtet ókilderi.

Eske sala keteıik, Pavlodar-Astana jolynda balalar mingen avtobýs aýdarylyp, jattyqtyrýshy kóz jumdy. Qaza tapqan er azamat 1990 jyly týǵan. Avtobýsty patrýldik kólik súıemeldemegeni belgili boldy.

Keıinirek jol apatynan jeti bala zardap shegip, Ereımentaý aýdandyq aýrýhanasyna jetkizilgenin, olardyń bireýi jansaqtaý bólimshesinde jatqanyn jazǵan bolatynbyz.