Pavlodar-Astana jolyndaǵy kólik apaty: balalardyń biri jansaqtaý bóliminde jatyr

PAVLODAR. KAZINFORM — «Mersedes» markaly shaǵyn avtobýstyń qatysýymen bolǵan jol apatynan jeti bala zardap shegip, Ereımentaý aýdandyq aýrýhanasyna jetkizilgen. Olardyń bireýi — jansaqtaý bóliminde. 

Dárigerler Pavlodar-Astana jolynda kólik apatyna túsken balalardyń jaǵdaıy týraly aıtty.

— «Astana-Ereımentaý-Shiderti» avtojolynyń 154-shi shaqyrymynda bolǵan jol-kólik apatynan 1990 jyly týǵan er azamat qaza boldy. Kámelet jasyna tolmaǵan jeti jasóspirim aýrýhanaǵa jatqyzyldy. Olardyń bireý jansaqtaý bóliminde. Balany oblystyq neırohırýrg qarap shyǵyp, sımptomatıkalyq em taǵaıyndaldy. Ózge alty bala jeńil jáne ortasha aýyrlyqta jaraqat alǵan, barlyǵy hırýrgııalyq bólimshege jatqyzyldy. Jaraqattan aman qalǵan toǵyz bala aýrýhananyń statsıonaryna ornalastyryldy, — dep málimdedi Ereımentaý aýdandyq aýrýhanasynan.

Dárigerler qazirgi ýaqytta statsıonarda tórt bala qalǵanyn, olar óz ata-analaryn kútip otyrǵanyn jetkizdi.

— Barlyq medıtsınalyq jáne uıymdastyrý is-sharasy qabyldandy. Aýrýhanada em qabyldap jatqan balalardyń jaǵdaılary turaqty. Jaǵdaı Aqmola oblystyq densaýlyq saqtaý basqarmasynyń baqylaýynda, — dep habarlady aýrýhanadan.

Al Pavlodar oblysy ákiminiń baspasóz qyzmeti óńirlik dene shynyqtyrý jáne sport basqarmasy men quqyq qorǵaý organdarynyń ókilderi oqıǵa ornyna barǵanyn habarlady.

— Balalardy alyp kelý úshin kólik uıymdastyrylǵan. Biraq ata-analar balalaryn ózderi alyp ketip jatyr, — dep málimdedi oblys ákiminiń baspasóz qyzmetinen.

Eske sala keteıik, Pavlodar-Astana jolynda balalar mingen avtobýs aýdarylyp, jattyqtyrýshy kóz jumdy.