Pavlodar — Astana baǵytyndaǵy aqyly avtoban qatty ystyqtan opyrylyp jatyr
PAVLODAR. KAZINFORM — Astana — Pavlodar avtobanynda jol jabyny aptap ystyqqa shydamaı, kóterilip ketken. «QazAvtoJol» mekemesiniń qyzmetkerleri búlingen ýchaskede asfalt-beton jabyndysyn tóseý jumystary júrgizilip jatqanyn habarlady.
Áleýmettik jelide I A sanatyndaǵy aqyly «Astana — Shiderti — Pavlodar — Ýspenka — RF shekarasy (Qosaq ó/p)» avtomobıl jolynyń Pavlodar — Astana baǵyty boıynsha 1356-shaqyrymynda beton joldyń qatty ystyqqa shydamaı kóterilip, opyrylyp túskeni týraly vıdeo tarap ketti.
Belgili bolǵandaı, aýa temperatýrasy +37°S-qa deıin kóterilýine baılanysty joldaǵy tsement-beton jabynynyń plıtalary kóterilip, opyrylǵan.
— Qazir ýaqytsha jol belgilerin ornatý jumystary oryndaldy. Tsement-beton jabynyn bólshekteý, sondaı-aq deformatsııalanǵan ýchaskede asfalt-beton jabyndysyn tóseý jumystary júrgizilip jatyr. Jumystarǵa 1 kompressor, 1 tigis keskish, 1 gıdrobalǵa, 2 buzǵysh balǵa, 1 tıegish, 2 samosval, 1 jol katogy jáne 14 qyzmetker jumyldyryldy. Sonymen qatar atalǵan avtomobıl jolynda turaqty negizde patrýldeý jumystary júrgizilip jatyr, — dep habarlady «QazAvtoJol» mekemesinen.
«QazAvtoJol» ulttyq kompanııasy júrgizýshilerden jóndeý júrip jatqan ýchaskelerde muqııat bolýdy, ýaqytsha jol belgilerin saqtaýdy jáne jyldamdyq rejımin qatań ustanýdy suraıdy.
Mundaı keleńsiz jaǵdaı byltyr da osy ýaqytta bolǵan edi. Araǵa jyl salyp taǵy qaıtalanyp otyr.
