Pavlodar - Astana baǵytyndaǵy aqyly avtoban qatty ystyqtan búlindi
PAVLODAR. KAZINFORM - Qazirgi ýaqytta tórt jolaqty, aqyly avtojoldyń Pavlodar – Astana baǵytyndaǵy 118-shi kılometrinde jyldamdyqty shekteý rejımi engizildi. «QazAvtoJol» mamandary búlingen ýchaskeni buzý, qalpyna keltirý jumystaryn júrgizip jatyr.
Búgin keshkilik Pavlodardan elordaǵa aparatyn avtobanda beton qabatynyń ystyqqa shydamaı kóterilip ketýi jaǵdaıy tirkeldi. 118-shi shaqyrymdaǵy oqıǵaǵa kýá bolǵan jolaýshylardyń sózinshe, bir jeńil avtokólik zııan shekken.
«QazAvtoJol» AQ Pavlodar oblystyq fılıaly dırektorynyń orynbasary Alekseı Logvınenko jol qabatynyń buzylýy qatty ystyqtyń saldarynan paıda bolǵanyn habarlady.
— «Astana-Pavlodar» aqyly avtojolynyń Astana baǵytyndaǵy 118-shi kılometrinde saǵat 18.30-da tsement-betondy qabattyń joǵary kóterilip ketýi tirkelip otyr. Bul qatty ystyqtyń saldary. Betondy jol bólinip-bólinip quıylyp, aralarynda deformatsııalyq tigis qaldyrylady. Bul tehnologııa aýa raıy ózgergende betonnyń buzylmaýy úshin qoldanylady ári jolǵa túsetin júktemeni azaıtady. Qazirgi ýaqytta oqıǵa ornynda eskertý belgileri qoıylyp, jyldamdyqty shekteý rejımi engizildi. Táýlik boıǵy kezekshilik uıymdastyryldy. Kásiporynnyń jol-qurylys tehnıkasy jiberilip, qazir mamandarymyz ol jerdiń tsement-beton qabatyn tolyqtaı buzady. Sodan soń ornyn toltyryp, ýaqytsha asfalttaıdy. Keıin ol jer qaıtadan betondalýy kerek, — deıdi Alekseı Logvınenko.
«QazAvtoJol» ókilderi atalǵan baǵytta jol júretin avtokólik júrgizýshilerine saq bolýdy eskertip otyr. Jyldamdyq rejımin saqtap, barynsha abaılaǵan abzal. Joldy qalpyna keltirý jumystary tún ortasyna deıin sozylýy yqtımal.
Eske sala keteıik, bıyl joldardy jóndeýge 781 mıllıard teńge qarastyrylǵan.