Pavlodar – Astana avtojolynda jóndeýge baılanysty shekteýler paıda boldy
PAVLODAR. KAZINFORM - Respýblıkalyq «Astana – Shiderti – Pavlodar – Ýspenka – RF shekarasy (Qosaq)» tas jolynyń ýchaskesinde jol jóndeý jumystary bastaldy.
Astana - Pavlodar avtobanynyń bir bóligi - Shiderti kenti mańyndaǵy nashar joldyń máselesi on jylǵa jýyq aıtylyp kelgen edi. Joldyń bul bóligi asfaltpen kómkerilgen. Jaqyn jerdegi Bozshakól kenishiniń júk kólikteri bul ýchaskeni únemi búldirip, elordamen eki ortada júretin kólik aǵynyna aıtarlyqtaı kedergi keltiredi. Ásirese 230-254 shaqyrym aralyǵy túnde júrgen ýaqytta qaýipti.
«QazAvtoJol» AQ Pavlodar fılıaly atalǵan jol bóliginde jóndeý jumystary bastalatynyn habarlady.
- Jóndeý kezinde avtobannyń bir jaq baǵyty ýaqytsha jabylyp, qozǵalys joldyń bir jaǵynda ǵana uıymdastyrylady. Sondyqtan júrgizýshiler muqııat bolyp, jóndelip jatqan ýchaskege jaqyndaǵanda jyldamdyqty aldyn ala azaıtqan jón. Ýaqytsha belgiler men tańbalar ornatylyp, arnaıy tehnıka jumys isteıtin bolady. Jalpy uzyndyǵy 22,5 shaqyrym jol bóligi jóndeledi, - dep málimdedi kompanııadan.
Atalǵan shekteýler kúzge deıin saqtalady dep kútilip otyr.
Eske sala keteıik, byltyr Pavlodar - Astana baǵytyndaǵy aqyly avtoban qatty ystyqtan búlingen bolatyn.
Al bıyl qysta Astana-Pavlodar avtojolynda jyldamdyq shektelgenine qaramastan kólik apattary eki ese kóbeıgen.
