Pavlodar-Astana avtobanynda ýaqytsha jabylǵan kópir apattyq jaǵdaıda tur ma
PAVLODAR. KAZINFORM — «QazAvtoJol» kompanııasynyń óńirlik fılıaly Qalqaman kenti mańyndaǵy kópirge aıtarlyqtaı zaqym kelgenin rastady. Ázirshe bul ýchaskedegi jol bóligi jabyq bolady.
Atalǵan kópirge 21 qarasha kúni ekskavatordy súıretip kele jatqan SHACMAN júk kóligi zaqym keltirgen.
— Júk kóligi ekskavatordy súırep, qorabyna onyń shómishin kóterip alǵan. Tehnıkalyq quraldar kópirden ótý bıiktigin (5,5 metr) saqtamaı, saldarynan ekskavator shómishi kópirdiń tómengi bóligine soqtyǵysqan. Qurylys nysanynyń temirbeton arqalyqtaryn tekserý nátıjesinde qurama-monolıtti qurylymynyń eki ortańǵy arqalyqtary zaqymdanǵany anyqtaldy. Ásirese shetki arqalyq kóbirek zııan shekken, — dep habarlady «QazAvtoJol» AQ Pavlodar oblystyq fılıalynan.
Mamandar tómengi jaqtaǵy beton qabyrǵasynyń sógilgenin, temir armatýralardyń úzilgenin, keıbiriniń maıysyp ketkenin anyqtaǵan. Buǵan qosa arqalyqta kóptegen jaryqtar paıda bolǵan. Osyǵan oraı birinshi arqalyqtyń jaı-kúıin «apatqa deıingi» dep jikteýge bolady. Al ekinshi arqalyqtaǵy jaryqtar kópirdiń jumysyn ýaqytsha shekteýge negiz bolǵan.
— Tekserý kezinde arqalyqtyń qulaý qaýpi nemese búkil kópirdiń opyrylyp túsý qaýpi anyqtalǵan joq. Kópir tolyqtaı zerttelip jatyr. Tehnıkalyq qaraýdan tolyq ótip, sarapshylar qorytyndysy berilgenshe kópirdegi qozǵalys shekteledi. DEÝ-61 qyzmetkerleri jyldamdyqty shekteý boıynsha qajetti jol belgilerin qoıdy, táýlik boıy kezekshilik uıymdastyrylyp jatyr, - dep qosty kompanııadan.
Mamandar atalǵan jolmen júretin júrgizýshiler Astana baǵytynda Bereke aýylyna burylyp, odan ári úlken jolǵa (aınalma jol 6 km) túsýi kerektigin eskertedi. Al keri baǵytta saparǵa shyqsańyz, Baıanaýyl avtojolyna burylyp, odan ári Qalqaman kenti arqyly ótesiz.
Eske sala keteıik, Pavlodar oblysynda kólik aıryǵyndaǵy kópirdiń shetki arqalyqtarynyń zaqymdalýyna baılanysty jol qozǵalysyna shekteý qoıyldy.