«Pavlodar arýy» qazylar alqasyn Abaıdyń 200 óleńin oqyp tańqaldyrdy
PAVLODAR. QazAqparat - Pavlodarda 2017 jyldyń eń ádemi boıjetkeni tańdaldy, dep habarlaıdy «QazAqparat» HAA tilshisi.
Sulýlyq baıqaýynda Pavlodar memlekettik pedagogıkalyq ınstıtýty fılologııa fakýltetiniń stýdenti Sánııa Temirhanova jeńiske jetti. Ol uly Abaıdyń 200 óleńin oqyp, kórermender men qazylar alqasynyń júregin jaýlady, dep aıtty uıymdastyrýshylar - Pavlodar oblystyq jastar saıasaty máseleleri basqarmasynda.
Sánııa poezııaǵa qushtarlyǵyn ózgeshe formada kórsetti: aqynnyń óleńder jınaǵy kórermenderge taratylyp, árbir qonaq kez kelgen betti ashyp, óleńniń alǵashqy jolyn oqydy. Sánııa bolsa, sol óleńdi tolyǵymen mánerlep jatqa aıtyp berdi.Al konkýrsqa on boıjetken qatysty.
«Daryndylar konkýrsynda ár qatysýshy óz qabiletin pash etýge tyrysty, - dedi oblystyq jastar saıasaty máseleleri basqarmasynyń baspasóz hatshysy Gaınel Mashrapova. - Qyzdardyń sheberliginde sóz joq».
Qazylar alqasynyń quramyna S.Toraıǵyrov atyndaǵy Pavlodar memlekettik ýnıversıteti PR-strategııalar men korporatıvtik kommýnıkatsııalar dırektory Rýslan Bilálov, J. Aımaýytov atyndaǵy qazaq mýzykalyq drama teatrynyń dırektory Muhtar Baıjumanov, I. Baızaqov atyndaǵy Pavlodar oblystyq fılarmonııasynyń dırıjeri Talǵat Kárimov, Jastar saıasaty máseleleri basqarmasynyń bólim basshysy Dáýren Ábdirahmanov pen qazylar alqasynyń tóraıymy Raısa Raıymbekova kirdi.
