«Pavlodar» arnaıy ekonomıkalyq aımaǵynda bıyl jeti kásiporyn iske qosylady
NUR-SULTAN. QazAqparat - Oblys ákimi Bolat Baqaýov «Pavlodar» arnaıy ekonomıkalyq aımaqqa baryp, ol jerde ındýstrııalyq jobalardyń júzege asyrylý jaıymen tanysty, dep habarlaıdy pavlodarnews.kz.
«Pavlodar» AEA» basqarma tóraǵasy Aıbek Tursynǵalıev aqparat jetkizgendeı, búginde arnaıy ekonomıkalyq aımaqta 22 ınvestıtsııalyq joba júzege asyrylýda. Solardyń jeteýi bıyl iske qosylady.
- Problemalyq jobalardyń biri túrik ınvestorlary oryndaýǵa kirisken folga óndirý boıynsha Kazfoil jobasy, - deıdi Aıbek Tursynǵalıev. – Olar merzimnen keshigýde. Túrik ókilderiniń aıtýynsha, qazirgi kezde qural-jabdyqtardy jetkizý máselesi qarastyrylýda.
Sonymen birge, olardyń ornyn basatyn dál sondaı ónim shyǵaratyn kompanııalarmen kelissózder júrgizilýde. Jospardan sál keshikse de, ýaqtyly boı kóteretin kásiporyndardyń biri – «ErtisNefteservıs» JShS. Kompanııa dırektory Amangeldi Sháripovtiń aıtýynsha, kásiporyn jylyna 2,5 myń tonna dızeldik janarmaıǵa arnalǵan qosymshalar shyǵara alatyn bolady.
- Tehnologııalyq máselelerge baılanysty jumystardy sál keshiktirdik, - deıdi Amangeldi Sháripov. – Degenmen, zaýyt josparǵa sáıkes bıylǵy jyldyń tórtinshi toqsanynda paıdalanýǵa beriledi. Jobanyń quny 467 mıllıon teńge. Zaýyt iske qosylǵannan keıin munda 30 adam turaqty jumyspen qamtylady.
Taǵy bir tyń joba – «SpetsPromServıs» JShS. Kásiporyn arnaıy ekonomıkalyq aımaqta ornalasqan zaýyttardyń qaldyqtaryn qaıta óńdeıtin bolady. Joba quny 150 mıllıon teńge.
- Búginde barlyq qujattardy qolǵa túsirdik, - deıdi «SpetsPromServıs» JShS quryltaıshysy Islám Qusaıynov. – 1,5 kılometr elektr symyn tartýdamyz. Qurylys alańy daıyn.
Oblys ákimi atalǵan kásiporynnyń ekologııaǵa sáıkestigin jiti zertteýdi tapsyrdy.
