Pavlodar arqyly Qyrǵystanǵa ketip bara jatqan kólik júrgizýshisi úsip qala jazdady
NUR-SULTAN. QazAqparat – Jolda úsip qala jazdaǵan kólik júrgizýshisi Reseıden Qyrǵyzstanǵa bara jatqan. Bul týraly QazAqparat Pavlodarnews.kz. saıtyna silteme jasap habarlaıdy.
Pavlodar oblysy Polıtsııa departamentiniń patrýldik polıtsııa rotasynyń komandıri Jaqsylyq Baıysbekovtyń aıtýynsha, Pavlodar oblysynda mereke kúnderi qatty aıaz, kóktaıǵaq bolady dep boljanýda. Keı jerlerde aýa temperatýrasy -43°deıin jetken. Eskertýlerge qaramastan, keıbir kólik júrgizýshileri alys joldarǵa shyǵady. Nátıjesinde avtokólikter tómen temperatýraǵa tótep bere almaı, tas joldarda toqtap qalady.
«Shiderti kentiniń janyndaǵy «Pavlodar-Nur-Sultan» avtojolynda joldy patrýldeý kezinde júk kóligi kózge tústi. Júk kóliginiń júrgizýshisi «Qazgıdromet» ortalyǵynyń eskertýine qaramastan jolǵa shyqqan. Biz kelgen kezde júrgizýshi eshqaıdan kómek kútpegen, qatty tońyp, úsip qalýǵa shaq qalǵan. Kele jatyp, júrgizýshiden ne bolǵanyn suradyq. Júrgizýshi Reseıden Qyrǵyzstanǵa jolǵa shyqqanyn aıtty. Aıazǵa baılanysty mashınada solıarka qatyp qalǵan. Osylaısha, olar túnnen beri turyp, qatyp qalǵan. Júrgizýshilerdi eń jaqyn lagerge jiberip, ózimiz kólikti jylytýmen aınalystyq», - dedi patrýldik polıtsııa rotasy qyzmetiniń ınspektory Rýslan Vereşak.
Kólikti Shiderti aýylynyń jyly boksyna jetkizgen. Kólik jylyǵannan keıin júrgizýshiler qaıta jolǵa shyqty. Rýslan men áriptesi Azamat Shaqshabaev júrgizýshilermen ár saǵat saıyn habarlasyp turǵan.
Qyrǵyzstan Respýblıkasynyń azamaty Aqtilek Arzybekov polıtseılerge kórsetken kómegi úshin alǵysyn bildirdi. Er adam júkti ýaqytyly jetkizý kerektigin aıtyp aqtaldy.
Polıtsııa habarlaǵandaı, búginde oblys avtojoldarymen patrýldik polıtsııanyń 12 ekıpajy júrip jatyr. Olardyń joldaǵy alǵashqy áreketteri – quqyq buzýshylyqtarǵa qarsy turý jáne jolda qalǵan júrgizýshiler men jolaýshylarǵa kómek kórsetý.
