Pavlodar alıýmınıı zaýytynda qos jumysshy zardap shekti

PAVLODAR. KAZINFORM — Alıýmınıı zaýytyndaǵy jazataıym oqıǵa 16 mamyr kúni túngi ýaqytta keptirý aımaǵyn tazalaý kezinde bolǵan. Qazirgi sátte zardap shekkenderdiń biri aýrýhanada jatyr.

Kásiporynnyń baspasóz qyzmetinen habarlaǵandaı, jumys protsesi barysynda № 3 peshte jınalyp qalǵan materıaldyń bir bóligi opyrylyp qulaǵan. Sol sátte aýmaqta dıirmen mashınısi men aglomeratsııa tsehynyń aglomeratshysy bolǵan. Oqıǵa saldarynan dıirmen mashınısiniń oń jaq aıaǵynyń jilinshigi synsa, ekinshi jumysshynyń oń jilinshigi qatty soqqy alyp, kógergen.

— Qos qyzmetkerge de jedel túrde alǵashqy kómek kórsetilip, oblystyq aýrýhanaǵa jetkizildi. Tekserý nátıjesi boıynsha aglomerator úıine jiberildi, ol ári qaraı ambýlatorlyq em qabyldaıdy. Al dıirmen mashınısi aýrýhanaǵa jatqyzyldy, — dep habarlady Pavlodar alıýmınıı zaýytynan.

Oqıǵadan keıin kásiporynǵa ónerkásiptik qaýipsizdik salasyndaǵy ýákiletti organnyń qyzmetkerleri barǵan. Tekserý qorytyndysy boıynsha qaýipti óndiristik nysanda apat belgileri anyqtalǵan joq.

Eske sala keteıik, buǵan deıin Aqsý ferroqorytpa zaýytynda jumysshy qaza tapqanyn jazǵanbyz.