Pavlodar ákimdigi Bolgarııaǵa delegatsııa jiberiletinin joqqa shyǵardy
PAVLODAR. KAZINFORM — Áleýmettik jelide Pavlodardan Bolgarııanyń Býrgas qalasyna baratyn delegatsııanyń tizimi tarady. Qujatta qala ákimi Hasar Habylbekov, ákimdik bólimderiniń birqatar basshylary jáne ákimniń týǵan baýyry kórsetilgen.
Áleýmettik jelilerde taraǵan qujatta Pavlodar delegatsııasynyń Býrgasqa sapary 2026 jylǵy 16-17 qyrkúıekke josparlanǵany kórsetilgen.
Tizimde qala ákimi, ákimdikke qarasty bólimderdiń keıbir basshylary men ákimniń týǵan baýyry bar. Sondaı-aq qujatta óner adamdarynyń tizimi bólek berilgen.
Qujatta sapar Býrgas mýnıtsıpalıtetiniń shaqyrýy boıynsha uıymdastyrylatyny jazylǵan.
Pavlodar qalasynyń ákimdigi resmı ókilderdiń atalǵan saparǵa qatysýy josparlanbaǵanyn málimdedi.
— 2022 jyly Pavlodar qalasy (Qazaqstan Respýblıkasy) men Býrgas qalasy (Bolgarııa Respýblıkasy) arasynda baýyrlas qala baılanysyn ornatý týraly memorandýmǵa qol qoıylǵan. Bıyl tamyz aıynda Pavlodar qalasynyń ákimdigine baýyrlas qalalar arasyndaǵy yntymaqtastyq aıasynda Býrgas merııasynan shaqyrý kelip tústi. Pavlodar qalasynyń ákimi men ákimdiktiń resmı ókilderiniń saparǵa qatysýy josparlanbaǵan, — dep habarlady ákimdikten.
Sonymen qatar ákimdik ókilderi Pavlodar ónerpazdarynyń Býrgasqa barýy josparlanyp otyrǵany nemese otyrmaǵanyn naqtylaǵan joq.
Eske sala keteıik, Pavlodarda joǵary laýazymdy sheneýnik 50 myń teńgelik syılyq alǵany úshin 1 mln teńge aıyppul arqalady.
