«Pavlodar ÁKK» qorynyń bas dırektory para aldy dep aıyptalyp otyr

PAVLODAR. QazAqparat - «Pavlodar «ÁKK «UK» AQ áleýmettik damý korporatıvtik qorynyń bas dırektory para aldy dep aıyptalýda. Bul jóninde Sybaılas jemqorlyqqa qarsy is-qımyl agenttiginiń baspasóz qyzmetine silteme jasap QazAqparat habarlaıdy.

Pavlodar oblysynyń sybaılas jemqorlyqqa qarsy qyzmeti «Pavlodar «ÁKK» «UK» AQ áleýmettik damý korporatıvtik qorynyń bas dırektoryna qatysty sotqa deıingi tergeýdi bastady. Ol sybaılas jemqorlyq qylmys jasady degen kúdikke ilindi.

«Ol aıaqtalmaǵan áleýmettik nysandy baǵalaý qyzmetin kórsetý týraly shart jasasqany úshin kásipkerlerden buryn kelisilgen 1 mln teńgeniń 500 myń teńgesin para retinde alǵan» delingen habarlamada.

Korporatıvtik qordyń bas dırektory ustalyp, Pavlodar qalalyq PB ýaqytsha ustaý ızolıatoryna qamaldy. Sotqa deıingi tergeý júrip jatyr.

Kúdiktige qatysty túpkilikti sheshimdi sot qabyldaıdy.